Հունգարական ծագմամբ ամերիկացի կինոդերասանուհի Ժա Ժա Գաբորը մահացել է կիրակի, կյանքի 100-րդ տարում։ Այդ մասին Variety պարբերականին հայտել է կինոդերասանուհու ներկայացուցիչ Էդ Լոցին։
Նրա խոսքով՝ Գաբորի մոտ գրանցվել է սրտի կանգ։ Դերասանուհին մահկանացուն կնքել է Բել-Էյր շրջանում (Կալիֆորնիա) գտնող իր առանձնատանը։ 2002 թվականին նա ավտովթարի էր ենթարկվել և այդ ժամանակից գամված էր հաշմանդամի սայլակին։ 2005 թվականին նա ունեցել էր ուղեղի ուժգին կաթված, ավելի ուշ բժիշկները ստիպված էին եղել անդամահատել նրա ոտքը՝ ծնկից վերև։
Գաբորի ստեղծագործական հաջողության պիկը եղել է 1952-58 թթ, սակայն նա շարունակել է նկարահանվել նաև 1970-80-ականերին։
Կարիերայի բուռն վերելքի ավարտից հետո նա շարունակել է ուշադրության կենտրոնում մնալ՝շնորհիվ իր հումորի և ամուսնությունների։ Մի անգամ սեքսի մասին լրագրողներից մեկի հարցին նա պատասխանել էր՝ ասելով. «Ես ինքս չգիտեմ սեքսի մասին ոչինչ, քանի որ միշտ ամուսնացած եմ եղել»։
Նրա վերջին ամուսինը՝ թվով 9-րդը, եղել է Ֆրեդերիկ ֆոն Անհալտը, ում հետ ամուսնացել էր 1986 թվականին։
1958 թվականին դերասանուհին «Ոսկե գլոբուս» էր նվաճել։ Ժա Ժան նկարահանվել է ավելի քան 60 ֆիլմերում և սերիալներում։ Նրան ամենից մեծ ժողովրդականություն են բերել «Մուլեն Ռուժ» (1952 թ), «Սիրո երեք պատմություն» (1953 թ), «Լիլի» (1953 թ), «Աղջիկը Կրեմլում» (1957 թ) և «Մեծ սիրո սերենադ» (1959 թ) ֆիլմերը։