Կառավարությունը դեկտեմբերի 1-ին ֆիքսեց գազի գինը 1000խ/մ-ի համար 150 դոլար: «Առաջին լրատվական»- ի հետ թեմայի շուրջ զրույցում «Իրազեկ քաղաքացիների միավորում» ՀԿ համակարգող Դանիել Իոաննիսյանը նշեց. «Հանրային ծառայությունները կարգավորող հանձնաժողովի վերջին որոշումից հետո տեսանք, որ քաղաքական որոշում է կայացվել. սահմանին գազի գինը չէր փոխվել, բայց որոշեցին, որ ընտրություններից առաջ պետք է ինչ-որ լավ բան անել և բնակչության համար գազի սակագինը նվազեցրին: Ամեն դեպքում գազի գնի մարժան շատ բարձր է և «Գազպրոմ»-ի գերշահույթներն ապահովված են»:
Դ. Իոաննիսյանի խոսքով՝ վերջին երեք տարում աշխարհում գազի գները մոտ 2,5-3 անգամ անկում են ապրել. «Եվրոպայում վաճառվող ռուսական գազի գինը 2,7 անգամ նվազել է: Երեք տարի առաջ Հայաստանի համար սահմանին գինը ֆիքսվեց 190 դոլար, մոտ մեկ տարի է 150 դոլար է և դա շատ բարձր գին է: Այս «դաշնակցային» գազի սակագինը բլեֆ է և վաղուց արտոնյալ չէ: Հայաստանը Ռուսաստանից շատ մոտ է, և ընդամենը 10 տոկոս տրանզիտ է տրվում Վրաստանին, այնինչ՝ Եվրոպան հեռու է և տրանզիտի ծախսերը բարձր են, սակայն գազի սակագինը եռապատիկ անկում է ապրել:
Ամեն տարի ոչ թե առևտրային, այլ քաղաքական որոշում է կայացվում, եթե Ուկրաինայի և Մոլդովայի պարագայում քաղաքական որոշում է կայացվում, հասկանալի է, քանի որ «Գազպրոմ»-ին այնտեղ այլընտրանք չկա, իսկ մեզ համար այլընտրանք կա՝ Իրանը, սակայն Հայաստանը իրանական գազի սակագնի շուրջ բանակցութուններ երբեք չի վարել: Հայաստանի իշխանությունների ռուսամետության պատճառով Հայաստանում գազի սակագինը բարձր է: Մենք մտել ենք ԵՏՄ, բայց ամենաթանկ գազ և էլեկտրաէներգիա ունեցող երկիրն ենք և դրանց թանկ լինելը Հայաստանում խոչընդոտում է արդյունաբերության զարգացումը»:
Դ. Իոաննիսյանի դիտարկմամբ՝ իշխանությունները գազի սակագնի նվազումը ներկայացնում են որպես հայ-ռուսական բարիդրացիական հարաբերությունների արդյունք, որպեսզի արդարացնեն իրենց վարած արտաքին քաղաքական կուրսը: Ամեն տարի մեզ քաղաքական որոշում է պարտադրվում. դա նշանակում է, որ Հայաստանը Ռուսաստանի նկատմամբ իրեն պետք է լավ պահի, որպեսզի գազի սակագինը չբարձրացնեն:
Մանրամասները՝ տեսանյութում:
