Դեկտեմբերի 1-ին տեղի է ունեցել «Լուսավոր Հայաստան», «Հանրապետություն», «Քաղաքացիական պայմանագիր» կուսակցությունների ներկայացուցիչների հանդիպում, որի ընթացքում ձեռք են բերվել համագործակցության վերաբերյալ հստակ պայմանավորվածություններ: Դեկտեմբերի 12-ին երեք կուսակցությունները հանդես կգան համատեղ հայտարարությամբ: Այս կապակցությամբ «Առաջին լրատվական»-ը մի քանի հարց ուղղեց «Հանրապետություն» կուսակցության առաջնորդ Արամ Զ. Սարգսյանին:
– Պարոն Սարգսյան, ՔՊ–ի, «Լուսավոր Հայաստան»-ի և «Հանրապետություն» կուսակցության գործակցությունը արդյո՞ք երկարատև է, ենթադրո՞ւմ է լուծարում՝ դառնալով մեկ կուսակցություն, ինչպես ավելի վաղ ՔՊ–ն էր պնդում։ Ենթադրո՞ւմ է արդյոք ընդլայնում, թե՞ այս ձևաչափն արդեն վերջնական է։
– Այսօր ես չեմ կարող ասել ավելին, քան այն, որ քննարկումները, որոնք տեղի են ունենում «Լուսավոր Հայաստան», «Քաղաքացիական պայմանագիր» և «Հանրապետություն» կուսակցությունների միջև, միտված են Ձեր կողմից նշված և նաև մեր հանրությանը հետաքրքրող մի շարք հարցերին անկեղծ, օբյեկտիվ և ընկալելի պատասխաններ գտելուն: Տա Աստված, որ մեզ մոտ ստացվի և փետրվարի 12-ին կարողանանք այդ մասին հստակ հայտարարել:
– Արտաքին քաղաքական կողմնորոշումը՝ մասնավորապես ՔՊ-ի՝ ոչ–ոչը Ձեզ չի՞ կաշկանդի, քանի որ Ձեր կուսակցությունը և ԼՀ–ը հստակ հայտարարում են, որ Հայաստանի ապագան տեսնում են որպես եվրոպական մոդելի պետություն։
– Ընդհանրապես ընտրություններին քաղաքական ուժերը մասնակցում են իրենց նախընտրած ձևաչափերով, ծրագրերով և կարգախոսներով: «Հանրապետություն» կուսակցությունը դաշինքով մասնակցության կողմնակից է ու բարեբախտաբար, այն ուժերի հետ, ում հետ մենք համագործակցում ենք, չհաղթահարվող և բացահայտ հակադիր տեսակետներ չունենք: Ինչ վերաբերում է «Քաղաքացիական պայմանագիր» կուսակցության մոտեցումներին, ապա շատ կասկածամիտներին կուզենայի հիշեցնել, որ պարոն Փաշինյանը ԱԺ քվեարկությունների ժամանակ «կողմ» է քվեարկել ԵՄ-ի հետ ասոցացման պայմանագրին և «դեմ» Եվրասիական տնտեսական միության հետ Հայաստանի միացմանը: Իմ կարծիքով՝ սա քաղաքական ուժի մոտեցումների մասին տեսակետ կազմելու լավագույն տարբերակն է:
– ԱԺ փոխխոսնակ Էդուարդ Շարմազանովը ,այսօր Ձեզ ի նկատի ունենալով` ասել է, որ երեքի միավորումը հաղթելու հնարավորություն չունի, որ հաղթելու համար ողջ ընդդիմադիր դաշտը պետք է միավորվի, իսկ «Հանրապետություն» կոսակցության մասով ցույց է տվել որ չի հիշում անունը և հետաքրքրվել, թե արդյո՞ք հարց տվող լրագրողները հիշում են այն:
– Լուրջ մի ընդունեք: Չեմ կարծում , որ մեր հանրությունը լուրջ է վերաբերվում էդ տղային: «Հանրապետություն» կուսակցությանը չհիշելու մասով էլ ասեմ, որ ոչինչ երիտասարդ է, պատահում է, կարող է հիշողության հետ կապված խնդիրներ ունի, չնայած իր տարիքում մեղք է, թող անպայման բժշկի դիմի…
Իսկ ավելի լուրջ, ՀՀ իշխանությունները դեռ 2003 թվականից բուծել են բազմաթիվ հաճախորդների, որոնց էլ ընտրական գործընթացներում օգտագործելուց հետո, պաշտոններ են տվել կամ մի զրո ավել ու պակաս վճարել: Հիմա էլ նույն վիճակն է, և 2017-ը բացառություն չէ: Ընդդիմադիր դաշտը վերահսկելու կամ ժամանակից շուտ փլուզելու իրենց տարբերակները արդեն հնացած են. թող նոր բան մտածեն։
