«17 տարվա ընթացքում մենք պետության, արդարադատության կողմից որևէ քայլ չտեսանք՝ ուղղված գործի անջատված մասով վերաբացմանը: Մեզ էլ են մեղադրում, ասում են՝ դուք ձայն չեք հանում, չեք բողոքում: Անձամբ ես մտածում եմ ինչ-որ բան անել, սպասում եմ, թե ինչ խորհուրդ կտան փաստաբանները, դիմել եմ նրանց: Բայց քանի դեռ բացահայտված չէ այս ահաբեկչության կազմակերպողը, հրահրողը, ավելի ճիշտ՝ պատվիրատուն, մենք այսպես ինքնիշխանությունը օր օրի կորցնելու ենք: Դատարանը ոչինչ չբացահայտեց: Չիմացանք, թե բացի այդ 5 հոգուց ովքեր կային իրենց գործակալներ, կողմնակիցներ… Արդյունքում ունենք այս ահավոր արտագաղթը, սոցիալական վիճակը, անարդարությունները»: Այս մասին այսօր լրագրողների հետ զրույցում ասաց Հոկտեմբերի 27-ի զոհերից Յուրի Բախշյանի այրին՝ Երևանի ավագանու անդամ Անահիտ Բախշյանը:
Անահիտ Բախշյանը վստահ է, որ Հոկտեմբերի 27-ն ուներ արտաքին պատվիրատու: «Մտահղացումը դրսում էր ձևավորվել, և դա շատ գործուն աջակցություն ուներ Հայաստանի ներսում: Ես սկզբում շատ բան չէի հասկանում, բայց երբ Լիտվինենկոն հայտարարություն արեց և մահացավ Անգլիայում, դրանից հետո ինձ համար շատ որոշակի դարձավ Հոկտեմբերի 27-ի դրսի ձեռագիրը:
Դատարանում մի բան բացահայտ էր. Նաիրի Հունանյանը ոչ մի տեղ չի թաքցրել իր մտադրության մասին, շատ մարդկանց է ասել, և մեր անվտանգության ծառայությունները չեն ասել՝ այդ ի՞նչ ես ասում:
Նախքան դատը սկսվելը ես գնացել եմ ՀՀԿ, կուսակցության ղեկավարներին հարցրել եմ՝ Նաիրին այսպիսի բան է ասել, չեք լսե՞լ, էդ ո՞նց եք թույլ տվել: Եվ գիտե՞ք ինչ պատասխանաեցին, ասացին. Էն ժամանակ ո՞վ չէր ուզում Վազգենին խփեր, ով ասես ուզում էր խփել, հո բոլորին չէի՞ն բռնելու,- նշեց Անահիտ Բախշյանը:
Մանրմասները՝ տեսանյութում: