Վերաքննիչ դատարանը հոկտեմբերի 24-ին քննում էր «Հիմնադիր խորհրդարանի» անդամ Կարո Եղնուկյանի գործով երկու բողոք: Առաջինը՝ կալանքի երկարացման վերաբերյալ էր, երկրորդը՝ խափանման միջոցը գրավով փոխելու: Դատարանը երկու բողոքն էլ մերժել է:
Կարո Եղնուկյանի պաշտպան Տիգրան Հայրապետյանը լրագրողների հետ զրույցի ընթացքում ասաց, որ դատական նիստի ընթացքում Կարո Եղնուկյանը ելույթ է ունեցել. «Ասաց, որ մենք կարծես շրջապտույտ ենք կատարում: Նա դատարանին ասաց, թե ամեն անգամ, երբ մենք ասում ենք, որն է նյութը, երբ գալիս եք դատարան, հայտարարություն եք անում, խնդրում ենք մատնանշել, միշտ քննիչները խուսափում են, ասում են՝ նախաքննական գաղտնիք է:
Ասաց, որ ԱՄՆ-ում կիրառություն կա, երբ քննիչն ասում է՝ նախաքննական գաղտնիք է, ապա դատարանը գոնե պետք է համոզվի, որ նման նյութ կա: Ասաց, եթե քննիչն անգամ բանավոր Ձեզ կասի, թե որ նյութն է նախաքննական գաղտնիք, որ ըստ էության, իմ դեմ ցուցմունք է տրված, խնդրում ենք, որպեսզի քննիչը կամ դատախազը դատարանին առանց բարձրախոսերի ասի, որպեսզի գոնե դատարանի մոտ նման համոզմունք առաջանա, հետո նոր գրավի դիմաց ազատ արձակելը մերժի:
Դատախազը ասաց, որ դա նախաքննական գաղտնիք է, նախաքննական գաղտնիքները մենք չենք հրապարակում:
Որևէ նյութ չկար, որ Կարո Եղնուկյանը կարող է խոչընդոտել նախաքննությանը, որևէ նյութ չկար, որ Կարո Եղնուկյանը կարող էր չներկայանալ: Ամեն դեպքում՝ առկա էր պատգամավորների, բազմաթիվ հայտնի անձանց, այդ թվում՝ երկու նախկին Մարդու իրավունքի պաշտպանների միջնորդությունները, որոնք բոլորն անտեսվեցին, և նաև գրավի աննախադեպ մեծ չափը (1 միլիոն դոլար) որևէ ձեւով չգնահատվեց, հաշվի չառնվեց:
Մեր կարծիքով՝ ակնհայտ անօրինական մոտեցում էր սա, քաղաքական մոտեցում է սա, և Եղնուկյանն իրեն համարում է քաղբանտարկյալ»:
Տիգրան Հայրապետյանը հավելեց, որ պատրաստվում է բողոք ներկայացնել. «Եղնուկյանը առաջարկում է չսպասել Վճռաբեկ դատարանին, հիմա արդեն եվրոպական դատարան բողոք ներկայացնել: Հնարավոր է՝ առանց Վճռաբեկ դատարան դիմելու դիմենք Եվրոպական դատարան»:
Մանրամասները՝ տեսանյութում: