Armtimes.com-ի փոխանցմամբ՝ երեկ երեկոյան Երևանի Թերլեմեզյան փողոցում գտնվող Լրագրողների դպրոցում դանակահարված 22-ամյա Լևոն Սահակյանի վիճակը շարունակում է մնալ ծայրահեղ ծանր: Արմենիա բժշկական կենտրոնից տեղեկացրին, որ երիտասարդը միացված է արհեստական շնչառության ապարատին:
Հարցին, թե արդյոք նրա կյանքին վտանգ է սպառնում՝ բժշկական կենտրոնից դրական պատասխան տվեցին՝ ընդգծելով, որ սրտի կծկումները շատ թույլ են:
Նշենք, որ Լևոն Սահակյանը վնասվածքներ է ստացել սրտի և թոքի հատվածում: Հիշեցնենք. դանակահարվածը Սևան քաղաքի բնակիչ, ատամնաբույժ Լևոն Սահակյանն է: Նա Հրազդանի բժշկական կենտրոնի ուրոլոգ Տիգրան Սահակյանի որդին է: 22-ամյա տղան դանակահարվել է Երևանի Թերլեմեզյան 3 հասցեում, որտեղ տեղակայված է «Պատանի լրագրողների» դպրոցը։
Կայքի տեղեկություններով դպրոցում, որտեղ դանակահարվել է 22-ամյա երիտասարդը, աշխատում է նրա նշանածը՝ Սևանի բնակիչ Արեգնազ Թ.-ն: Վերջինս դպրոցի ղեկավարության հետ 80 հազար դրամի աշխատավարձի վեճ է ունեցել, և նրա նշանածը որոշել է գնալ դպրոց ու հասկանալ աշխատավարձը չվճարելու պատճառը:
Մանրամասները՝ սկզբնաղբյուր կայքում