Թուրքական Milliyet թերթի փոխանցմամբ՝ Թուրքիայի վարչապետ Բինալի Յըլդըրըմը այսօր ընդունել է Բուլղարիայի վարչապետ Բոյկո Բորիսովին: Հանդիպումը տևել է 1 ժամ 20 րոպե:
Հանդիպումից հետո կազմակերպված համատեղ մամուլի ասուլիսի ժամանակ Բինալի Յըլդըրըմը անդրադարձել է Սիրիայի հյուսիսում Թուրքիայի զինված ուժերի ձեռնարկած «Եփրատի վահան» գործողությանը:
«Այդ գործողությունը կշարունակվի այնքան ժամանակ, քանի դեռ 100 տոկոսով չի ապահովվել Թուրքիայի սահմանի, նրա քաղաքացիների ու նրանց գույքի անվտանգությունը:
Մենք գործողությունը կշարունակենք այնքան ժամանակ, քանի դեռ շրջանը չենք ազատագրել ԴԱԻՇ-ից ու ահաբեկչական այլ տարրերից: Մենք ի սկզբանե պաշտպանել ենք ինչպես Թուրքիայի, այնպես էլ Սիրիայի տարածքային ամբողջականությունը:
Ահաբեկչական այդ կազմակերպություններն անջատողական նպատակներ են հետապնդում Թուրքիայում ու Սիրիայում, ցանկանում են այստեղ ստեղծել այսպես կոչված պետություն: Նրանք երազում են այդ մասին, սակայն նրանց ոչինչ չի հաջողվի»,- ասել է Թուրքիայի վարչապետը:
