«Այսպես կոչված՝ քաղաքական, ոհմակային ռեժիմը անվանազրկեց անունները, բարոյազրկեց քաղաքական իմիջները, քաղաքականությունը սարքեց զրո և դաշտ ներմուծեց կրիմինալը»,- «Առաջին լրատվական»-ի հետ զրույցում ասաց ազատամարտիկ, «Կոռնիձոր» ջոկատի հրամանատար Արայիկ Խուդավերդյանը՝ անդրադառնալով հարցին, թե ինչու ազատամարտիկները սկսեցին մուտք գործել քաղաքական պայքարի դաշտ:
Այնուհանդերձ, մեր զրուցակիցը չի համարում, որ ազատամարտիկը կարող է լրացնել քաղաքական ներկապնակը՝ իր ձեռքը վերցնելով քաղաքական պայքարը. «Եթե կան մարդիկ, որոնց 1-2 տեղ են խոստացել պառլամենտում, թող ուղղակի փոխեն խաղի կանոնները, բայց ոչ՝ Ազատամարտին մասնակից տղաներին դաշտ մտցնեն և հետո նորից դաշտից հանեն: Այդ տղաները օր օրի սնանկանում են, իսկ մյուսները, ովքեր թելադրում են խաղը, բազմել են փողերի ու հողերի վրա»:
Արայիկ Խուդավերդյանը անթույլատրելի է համարում ազատամարտիկին Թատերական հրապարակ վերադարձնելը, այն էլ՝ պատասխանատու, ավանգարդի կարգավիճակով:
«Ազատամարտիկների մեջ մենք չունենք քաղաքական, ինտելեկտով, զարգացած այն մասսան, որը կկարողանա քաղխորհուրդ ձևավորել: Իսկ եթե միայն մի քանի հոգու համար է սա պետք, ավելի լավ է՝ այդ մի քանիսը էս գլխից տրվեն էն մի քանիսին, ովքեր ունեն բաց դռների քաղաքականություն և ասում են՝ մեր հաճախորդներն են»,- ասաց Արայիկ Խուդավերդյանը՝ չբացառելով, որ որոշ խելացի ազատամարտիկներ կարող են օգտագործել նվիրյալ ազատամարտիկների ուժը՝ իրենց անհատական շահերի համար:
Ինչ վերաբերում է «Սասնա ծռերի» գործողություններին, ազատամարտիկը նշեց, որ այս տղաների գործը կիսատ մնաց: «Նրանք 15 օր անց ոտքերից կամ հետույքից վիրավորվելով՝ հանձնվեցին, մինչդեռ իրենց գործողությունները պետք է իրականացնեին Բաղրամյան 26-ում՝ պահանջելով նախագահի հրաժարականը. վիշապի գլուխը կտրում են այնտեղ, որտեղ նա փակել է ջրի ճանապարհը, ոչ թե վիշապի պոչն են մաքրում»: Նրա կանխատեսմամբ՝ Հայաստանում մոտ ապագայում մենք կարող ենք սպասել ինքնաբուխ զինված բախումներ պետական բարձրագույն այրերի հետ, և կստեղծվի անկանխատեսելի, չուղղորդվող և քաոսային իրավիճակ:
Ազատամարտիկի կարծիքով՝ եթե ժամ առաջ տեղի չունենան համակարգային կամ կադրային փոփոխություններ, ապա կիսամուսուլմանական հնգյակին ոչինչ չի խանգարի՝ հայից կերտելու քաղաքակիրթ գնչու:
Իսկ Արցախի հողերի հանձնման թեման Արայիկ Խուդավերդյանը համեմատեց «Գույք՝ պարտքի դիմաց» գործարքի հետ. «Հող հանձնողի 7 պորտի գերեզմանը անգամ կպղծվի: Թող չփորձեն ղումար խաղալ էդ հողի վրա. մե՛նք ենք ձեռք բերել էդ հողը»:
