Արդեն 8-րդ օրն է՝ գրավված է մնում Պարեկապահակային ծառայության գունդը: «Սասնա ծռեր» անդամներին առաջին իսկ օրից տրվել են տարբեր որակումներ. ոմանք նրանց համարում են ահաբեկիչներ, ոմանք՝ ապստամբներ, ոմանք՝ հերոսներ:
Իսկ թե ովքեր են նրանք իրավական տեսակետից, փաստաբան Նորայր Նորիկյանը «Առաջին լրատվական»-ի հետ զրույցում նշեց. «Հայաստանում մենք գործ ունենք վերջին 25 տարիների ընթացքում իր նախադեպը չունեցող գործունեության հետ, երբ մի խումբ անձինք իրենց քաղաքական խնդիրները լուծելու նպատակով զենք են բարձրացրել, որի արդյունքում ամբողջ երկիրը՝ հասարակության հետ միասին, գտնվում է դրամատիկ իրադարձությունների զարգացման ֆոնին»:
Նորայր Նորիկյանի կարծիքով՝ տղաների ներկայացրած պահանջները կարող են դառնալ քաղաքական լուրջ գործընթացների հիմք. «Այդ մարդիկ այլ ելք չեն գտել՝ ներկայացնելու իրենց քաղաքական պայքարը: Նրանք համարում են, որ Հայաստանում քաղաքական գործընթացները ամբողջությամբ կրում են իմիտացիոն բնույթ, և իրենք համոզված են, որ իրենց կատարած արարքը արդարացված է»:
Մեր զրուցակիցը հասկանում է այդ մարդկանց, բայց չի հասկանում իշխանությունների արձագանքը. «Մինչ օրս Հայաստանի պետական բարձրագույն իշխանությունն է անգամ ձեռնպահ մնում որոշակի գնահատական տալ այս անձանց գործողություններին: Իշխանությունները կարծես հույսը դրել են ապստամբող տղաների վարքագծում հնարավոր փոփոխություններին, մինչդեռ իշխանությունը ինքը պետք է օրակարգ թելադրեր»:
Այնուամենայնիվ, մեր զրուցակիցը համարում է, որ թեև այս մարդկանց պահանջներն ունեն օրինական հիմքեր, բայց գործունեության մեթոդներում առկա են քրեա-իրավական հետևանքներ առաջացնող տարրեր. «Եթե մենք ուզում ենք ապրել իրենց պատկերացրած կամ երազած Հայաստանում, այդ մարդկանց արարքներին պետք է տրվի քրեա-իրավական գնահատական: Այդ մարդիկ վաղ թե ուշ պետք է կանգնեն արդարադատության առջև, որպեսզի մենք իրենց մաքառումի, պայքարի արդյունքում կառուցենք այն Հայաստանը, որի մասին երազում են իրենք»:
Նրա խոսքով՝ հարյուր հազարավոր մարդիկ նույն բանն են ասում, ինչ Պավլիկ Մանուկյանը, բայց՝ առանց զենքի. «Ուստի Հայաստանի իշխանությունները ստեղծված իրավիճակից, երկրում ստեղծված քաղաքական-հասարակական ճգնաժամից անարյուն դուրս գալու հստակ օրակարգ պետք է նախանշեն: Այս ամենը գուժում է այն մասին, որ Հայաստանում քաղաքական համակարգը ամբողջովին ավիրված է, քաղաքական ինստիտուտները չեն գործում, և որ անկախությունից ի վեր իշխանության ձևավորման ընթացակարգը ամբողջովին խաթարված է ու այլասերված, և կորսված է պետություն-հասարակություն կապը: Հակառակ դեպքում մենք չէինք ունենա այսպիսի պայթյունավտանգ իրավիճակ»:
Մանրամասները՝ տեսանյութում: