«Առաջին լրատվական»- ը զրուցել է «Սասնա ծռեր» խմբի անդամ, ազատամարտիկ Մխիթար Ավետիսյանի հետ:
-Պարոն Ավետիսյան, Արցախից այստեղ եկաք սկզբում «Հիմնադիր խորհրդարան», «Նոր Հայաստան» հանրային փրկության ճակատ… Հայրենիքը ազատագրելու ուրիշ մեթոդները կարծում եք, որ արդարացված չէի՞ն:
-Վստահ եմ, որ մենք փորձել ենք բոլոր քաղաքական խաղաղ միջոցները, վաղուց ես գիտեի, որ այլ ձև չկա, ինքս վաղուց եմ պատրաստվել սրան: Ի տարբերություն շատ շատերի, ես հասկացել եմ, որ եթե մենք անվանում ենք ռեժիմ, բանդա, քրեաօլիգարխիկ համակարգ… դրանցից ձերբազատվել կարելի է միայն ուժի միջոցով, զենքով:
-Պարոն Ավետիսյան, հավանաբար ծանոթ եք Ս. Սարգսյանի և Լ. Տեր-Պետրոսյանի հայտարարություններին, ի՞նչ եք կարծում, ինչ-որ միավորված, կոալիցիոն գործունեությո՞ւն է ծավալվելու ձեր դեմ:
-Ես միշտ ասել եմ, հիմա էլ վստահ եմ, որ առաջին, երկրորդ, երրորդ նախագահներն իրարից շատ հեռու չեն կանգնած. այդ համակարգն ստեղծվել է Լևոն Տեր-Պետրոսյանի օրոք, շարունակողները եղել են երկրորդ, երրորդ նախագահները և իրենք երբեք, ինչքան էլ իրենց մեջ տարաձայնություններ են եղել, չէին ցանկանում, որ համակարգը փլվի, որ ինչ-որ քաղաքական ընդդիմադիր ուժեր գան իշխանության: Դրա համար էլ նկատեցիք, Ս. Սարգսյանը, Լ. Տեր-Պետրոսյանը առաջ իրար հայհոյում էին, քաղաքական գնահատականներ էին տալիս, ապրիլյան պատերազմից հետո փորձեցին ինչ-որ բաներ գտնել, ցույց տալ, բայց ես վստահ եմ, որ իրենց միջև կապ միշտ էլ եղել է և այսօր էլ երեքի միջև էլ կա:
-Պարոն Ավետիսյան, ինչպե՞ս եք նայում նրան, որ Խորենացի փողոցի հարթակում Նիկոլ Փաշինյանն է, նա է ղեկավարի դեր ստանձնել: Մի կողմից նա կիսում է ձեր պահանջը՝ Ս. Սարգսյանի հրաժարականը, մյուս կողմից էլ տեսակետներ կան այն մասին, որ ինքը չպետք է ստանձներ, այլ ձեզնից մեկը, ով այս պահին այստեղ չէ, դրսում է:
-Համաձայն եմ, որ ինքը չպետք է ստանձներ, այլ մեզանից մեկը, ով դրսում է: Ոչ միայն Փաշինյանի, այլ նաև Օսկանյանի խոսքը լսեցի, լսողը հասկանում է, որ մեզ են պաշտպանում, բայց այս բոլոր քաղաքական ուժերը, գործիչները ընդամենը փորձում են այս պահին ստեղծված իրավիճակում ինչ-որ դիվիդենտներ շահել: Եթե իրենք իսկապես ուզում են, որ Հայաստանում իշխանափոխություն լինի, վաղուց պետք է հասկացած լինեին, որ այս երկրում հնարավոր չէ իշխանափոխություն՝ ընտրությունների միջոցով, բացառվում է:
-Պարոն Ավետիսյան, ձեր անվտանգության երաշխավորն էին այն 4 պատանդերը, որ ձեզ հետ էին, հիմա նրանց ազատ արձակումով և մանավանդ հաշվի առնելով Ս. Սարգսյանի հայտարարությունը, ձեր դիրքերը չե՞ն թուլանում:
-Պատանդները մեր անվտանգության երաշխավորը չէին: Մենք այդպիսի նպատակ, առաջին օրվանից սկսած, չունեինք, դրա համար մեկ-մեկ բաց էինք թողնում, իսկ հեռուստատեսությունը ներկայացնում էր, որ ինչ-որ գործողություն են իրականացրել, հետո բաց ենք թողել: Այդպիսի բան չի եղել, բոլոր պատանդները ազատ են արձակվել մեր բարի կամքով: Այս 4 հոգին էլ մեզ համար երաշխիք չէին, որ մեզ վրա չեն հարձակվի: Մենք գիշեր-ցերեկ չենք քնում, հսկում ենք, ինչ-որ պետք է՝ ռազամավարական, մարտավարական տեսակետից, կիրառել ենք: Մեզ հետ ներս էինք բերել բազմաթիվ զենքեր, այստեղ վերցրել ենք մի ամբողջ արսենալ, և ամեն քայլի պատրաստ ենք, պատրաստ ենք հակագրոհելու: Եթե իշխանությունները չվախենային, նրանք թքած ունեն այդ 4 հոգու վրա, ինչպես և ամբողջ ազգի վրա, նրանք պատկերացնում են, թե ինչ կլինի, կլինեն հարյուրավոր զոհեր, գուցե և ազատեն այս տարածքը մեզանից, մեր դիակներն այստեղ մնան, բայց իրենք վստահ են, որ հարյուրավոր զոհեր կլինեն: Մենք առավել ևս, քան իշխանությունները, չենք ուզում, որ այդ ընդհարումը լինի, որովհետև երկու կողմից էլ կզոհվեն շատ լավ հայեր: Ո՛չ մի օլիգարխի, ո՛չ մի հանցագործի լակոտ չի գալու մեր դեմ, բերելու են ոստիկանական ուժերի ջահել տղաների, այսինքն՝ մենք ենք դա ափսոսողը, իշխանությունները չեն ափսոսա, բայց իենք վախենում են, թե հետո ինչ կլինի: Մարտի 1-ի 10 զոհի մեղքի տակից դեռ իրենք դուրս չեն եկել:
-Պարոն Ավետիսյան, ձեր ճակատին սպի եմ տեսնում, ի՞նչ փուլում է ձեր առողջական վիճակը:
-Հոյակապ, շատ լավ, խնդիր չկա: «Կրազով» երբ խփեցինք, դարպասները ջարդեցինք, այդ ժամանակ մի փոքր վնասվածք ստացա:
