«Ոստիկանությանը տրված էր մարդկանց հոշոտելու ազատությունը, ոստիկանական հրոսակները ասպատակում էին Երևանով մեկ՝ հետապնդումներով և այլն, և հանկարծ այս ամեն ինչը վերջացավ: Պարզ չէ՞, որ այդպիսի հատուկ ցուցում կար»,-«Առաջին լրատվական»- ի հետ զրույցում այս մասին ասաց իրավապաշտպան Ժաննա Ալեքսանյանը:
Անդրադառնալով Հայաստանում ստեղծված արտառոց իրավիճակին և Ս. Սարգսյանի հայտարարությանը՝ իրավապաշտպանն ընդգծեց. «Սերժ Սարգսյանը խոսեց 6-րդ օրը, մինչ այդ 6 օր մարդկանց ահաբեկում էին, խոշտանգում էին, սարսափի մեջ էին պահում, քաոսային իրավիճակ էր ստեղծվել, և որևէ զսպող մեխանիզմ չկար: Ս. Սարգսյանը հավանաբար հետևում էր, թե ինչպես են խոշտանգում մարդկանց:
Պետք է հատուկ ընդգծեմ, որ ոստիկանության սանձարձակությունն աննախադեպ էր՝ այլասերվածության հասնող երևույթներով, օրինակ՝ ասել՝ կոշիկս լիզի՛ր, կամ զորանոց տանել և գերի վերցնել մարդկանց, թույլ չտալ օգնություն ցուցաբերել անգիտակից վիճակում գետնին ընկած Դավիթ Սանասարյանին, մյուս բերման ենթարկվածներին ձեռքերը վեր կանգնեցնել՝ ինչպես ֆաշիստական Գերմանիայում, համակենտրոնացման ճամբարներում: Եվ եթե 6-րդ օրը Սերժ Սարգսյանը չխոսեր, հավանաբար ոստիկանության այս լկտի, այս սանձարձակ պահվածքը պիտի շարունակվեր մինչև օրս»:
Մանրամասները՝ տեսանյութում: