Մեր պահանջն է մնում Սերժ Սարգսյանի հրաժարականը և վստահության կառավարության ձևավորումը: Այս մասին Խորենացի փողոցում հայտարարեց «Հիմնադիր խորհրդարանի» անդամ Ալեք Ենիգոմշյանը: Ենիգոշմյանի առաջարկով հավաքվածները մեր րոպե լռությամբ հարգեցին զոհված գնդապետ Արթուր Վանոյանի հիշատակը:
«Տղաների սխրանքը, որ մեզ վերստին հանել է ոտքի և այսօր մենք հավաքվել ենք այստեղ, սա նշանակում է, որ ես վստահ եմ, որ այստեղ գտնվող յուրքանչյուրը վճռած է պայքարել քաղաքացիական ճանապարհով մինչև տղաների նպատակների իրականացում և դա նշանակում է, որ այստեղ գործ չունեն մարդիկ, ովքեր շեղվում են այդ նպատակից»,- հայտարարեց Ալեք Ենիգոմշյանը:
Նա նշեց, որ այսօր մեր երկիրը գտնվում է երկու ճգնաժամի մեջ՝ մեկն այն ճգնաժամն է, որի մեջ գտնվում է երկիրը արդեն տարիներ շարունակ, իսկ մյուսը՝ հուլիսի 17-ին ստեղծվածը: Դրանք երկուսն էլ, ըստ Ենիգոմշյանի, անհապաղ լուծում են պահանջում:
«Ներկայացված պահանջները անհնարին չեն: Սերժ Սարգսյանին մնում է բանակցությունների գնալ Ժիրայր Սեֆիլյանի հետ»,- ընդգծեց Ա. Ենիգոմշյանը՝ հավելելով, որ պահանջները մնում են նույնը:
«Թող Սերժ Սարգսյանը չասի, որ չունի այլընտրանք։ Դու ունես այլընտրանք, ու եթե չգնաս այլընտրանքին, այլ գնաս արյունահեղության, ոչ միայն ՊՊԾ գնդի տարածքում գտնվող տղերքի, ոչ միայն տասնյակ ոստիկանների արյունը, այլ նաև Հայաստան երկրի դժխեմ ճակատագիրը մնալու է միայն քո և քո նմանների ուսերին: Չհամարձակվեք գնալ նման քայլի, որովհետև դա լինելու է Ձեր վերջը»,- հայտարարեց Ալեք Ենիգոմշյանը։
Նա տեղեկացրեց, որ վաղվանից ձևավորվելու է համակարգող մարմին, որը «առանց խանդի, մրցակցության մշակելու է հետագա քայլերը»։
Մանրամասները՝ տեսանյութում:
