ԱՄՆ պետքարտուղար Ջոն Քերին Հանրապետության օրվա կապակցությամբ շնորհավորել է Ադրբեջանի ժողովրդին: ԱՄՆ պետդեպարտամենտի տարածած այսօրվա հայտարարության մեջ Քերին ընդգծել է, որ ԱՄՆ-ը, ինչպես նախկինում, հավատարիմ է Ղարաբաղյան հակամարտության կարգավորմանն աջակցելուն: Քերիի խոսքով՝ ԱՄՆ-ը գնահատում է ծայրահեղականության դեմ պայքարում Ադրբեջանի հետ համագործակցությունը:
«ԱՄՆ-ն ու Ադրբեջանն ավելի քան մեկ քառորդ դար աշխատել են միասին՝ ելնելով Եվրոպայում ու նրա սահմաններից դուրս անվտանգության ու բարգավաճման շահերից:
Ադրբեջանը կենսական կարևոր դեր է խաղում որպես էներգակիրների մատակարար եվրոպական շուկաներ, և ԱՄՆ-ն ամբողջովին աջակցում է տարածաշրջանում էներգետիկ դիվերսիֆիկացման ընդլայնման ձեր ջանքերը»,- ասվում է Քերիի շնորհավորական ուղերձում:
Իր հերթին, ԵԱՀԿ Մինսկի խմբի ամերիկացի համանախագահ Ջեյմս Ուորլիքը հայտարարել է, որ համանախագահները արտակարգ այցով տարածաշրջան մեկնելու ծրագիր չունեն:
Նա նշել է, որ համանախագահները հուսով են հանդիպել Հայաստանի ու Ադրբեջանի արտգործնախարարների հետ հունիսին պլանավորված նախագահների գագաթնաժողովը նախապատրաստելու համար: «Մեր նպատակը բանակցությունների համար հող նախապատրաստելն է, որոնք կտանեն դեպի խաղաղության բազմակողմ համաձայնագիրը»,- ասել է Ուորլիքը:
ՄԱԿ-ի գլխավոր ասամբլեայում և Անվտանգության խորհրդում տարածվել է ԼՂՀ արտաքին գործերի նախարարության հայտարարությունը Ադրբեջանի սպիտակ ֆոսֆոր պարունակող արկերի կիրառման մասին ապատեղեկատվության վերաբերյալ։
Մասնավորապես, հայտարարության մեջ ԼՂՀ-ն պատրաստակամություն էր հայտնել ընդունելու հատուկ դիտորդական առաքելություն՝ տեղում բոլոր փաստերն ուսումնասիրելու և ապրիլի 2-5 Ադրբեջանի կողմից սանձազերծված ագրեսիայի հանգամանքներն ու դրա ընթացքում իրագործված միջազգային մարդասիրական իրավունքի նորմերի խախտումները հետաքննելու համար:
Ադրբեջանի ԱԳՆ-ն մայիսի սկզբին հայտարարել է, թե մտադիր է Ադրբեջանում հավատարմագրված արտերկրյա դեսպանությունների ռազմական կցորդներին ներկայացնել չպայթած ֆոսֆորային զինամթերքը, որը հայտնաբերվել է շփման գծին մոտ ադրբեջանական գյուղերից մեկում: Ըստ Ադրբեջանի ՊՆ-ի՝ այն քիմիական նյութ է պարունակում:
Արցախի Հանրապետության պաշտպանության բանակի մամուլի խոսնակ Սենոր Հասրաթյանն իր հերթին հայտարարել է, որ Ադրբեջանի ԱԳՆ-ի կողմից տարածված հայտարարությունն այն մասին, թե իբր ապրիլի ռազմական գործողությունների ընթացքում հայկական զինված ուժերն ադրբեջանական խաղաղ բնակչությանն ու քաղաքացիական օբյեկտներին հարվածներ են հասցրել նաև սպիտակ ֆոսֆոր պարունակող արկերով, Բաքվի կողմից շարունակ հորինվող և իրականության հետ որևէ աղերս չունեցող ապատեղեկատվական հնարք է:
