Միլիարդատեր Դոնալդ Թրամփը հասարակ ամերիկացիների պաշտպանը չէ և ԱՄՆ նախագահ ընտրվելու դեպքում մեծ շահույթ կստանա նրանց անհաջողություններից: Այսպիսի մեղադրանքով երեքշաբթի հանդես է եկել Դեմոկրատական կուսակցությունից ԱՄՆ նախագահի թեկնածու Հիլարի Քլինթոնը՝ հայտնում է TASS-ը:
Նա հիշեցրել է, թե ինչպես է 10 տարի առաջ Թրամփը պատասխանել ԱՄՆ-ում բնակարանային և հիփոթեքի շուկայում առաջիկա փլուզման մասին հարցին: «Ես որոշ իմաստով հուսով եմ, որ այն (փլուզումը) տեղի կունենա, քանի որ այդ դեպքում այնպիսի մարդիկ, ինչպիսին ես եմ, կակտիվանան և (անշարժ գույք) կգնեն: Եթե «պղպջակը» պայթի, դրա միջոցով հնարավոր կլինի փող ստեղծել»,- այն ժամանակ հայտարարել էր Թրամփը:
«Նա իրականում դա ասել է: Իսկ հիմա նա հայտարարում է ֆինանսական սահմանափակումները վերացնելու ցանկության մասին, որոնք մենք դրել ենք Ուոլ-սթրիթի վրա, նա ուզում է Ուոլ-սթրիթիին թույլ տալ նորից կատաղել: Մենք ձեզ հետ միասին նրան թույլ չենք տա դա անել»,- ասել է Քլինթոնը կողմնակիցների առաջ ելույթի ժամանակ:
Հանրապետականը հակադարձել է Քլինթոնի մեղադրանքին. «Ես ձեռնարկատեր եմ, ես քիչ չեմ վաստակել, երբ շուկան (անշարժ գույքի) անկման վիճակում էր: Առանձին դեպքերում ես նույնիսկ ավելին եմ վաստակել, քան երբ շուկան վերելք էր ապրում: Հենց այսպիսի մտածելակերպ է պետք մեր երկրին, այն հնարավորություն է տալիս լավ արդյունքների հասնել ծանր իրավիճակում. քաղաքական գործիչներն այդպես չեն կարողանում»,- ասել է Թրամփը:
