Մայիսի 24-26-ը Հայաստանի Հանրապետությունում Հավաքական անվտանգության պայմանագրի կազմակերպության անդամ-պետությունների օպերատիվ արձագանքման հավաքական ուժերի կազմում ներգրավված հատուկ նշանակության ուժերի կազմավորումների, ներքին գործերի և ոստիկանության ստորաբաժանումների մասնակցությամբ անցկացվում է «Կոբալտ-2016» մարտավարա-մասնագիտական զորավարժությունը:
Մասնակցել են Ղազախստանի Հանրապետության, Ղրղըզստանի Հանրապետության, Ռուսաստանի Դաշնության, Հավաքական անվտանգության պայմանագրի կազմակերպության, Հայաստանի Հանրապետության ոստիկանության և Ոստիկանության զորքերի ներկայացուցիչները:
ԱԺ պատգամավոր, պաշտպանության և անվտանգության հարցերով մշտական հանձնաժողովի անդամ Թևան Պողոսյանի կարծիքով՝ ՀԱՊԿ-ն արհեստական ինստիտուտ է, որը կազմավորվել է Ռուսաստանի կողմից, սակայն անդամ-պետությունները ներգրավվել են ոչ թե կոլեկտիվ արժեքների համար, այլ պարզապես Ռուսաստանի հետ հարաբերությունները բարելավելու:
Կա մեկ այլ մտահոգություն ևս. Հայաստանը լինելով ՀԱՊԿ անդամ՝ այդ պետությունից չի ստանում աջակցություն՝ անգամ երբ անմիջապես Հայաստանի պետական սահմանի նկատմամբ է հակառակորդը ոտնձգություն անում, երբ Հայաստանի գյուղերում են խաղաղ բնակիչներ զոհվում, սակայն ՀԱՊԿ անդամ-պետություններն իրավունք ունեն իրենց ոստիկանական զորքերը ՀԱՊԿ-ի շրջանակներում գործուղել այստեղ, եթե լինի դրա անհրաժեշտությունը:
Պատգամավոր Թևան Պողոսյանը, սակայն, չի կարծում, թե Հայաստանում ներքին խռովությունների ժամանակ նման բան կպատահի:
Մեր զրուցակիցը հավելում է՝ մենք ինքներս պետք է փորձենք չլինել այնպիսի երկիր, երբ այլ պետություն կկարողանա օգտագործել մեզ իր շահերի համար:
Հավելենք, որ ՀԱՊԿ գլխավոր քարտուղար Նիկոլայ Բորդյուժան քննարկումներից մեկի ժամանակ պատասխանելով լրագրողի հարցին՝ արդյոք պայմանավորվածություններ կա՞ն ՀԱՊԿ-ի ուժերը օգտագործելու անդամ երկրներում, ասենք՝ ընդդիմության չափից ավելի ակտիվության պարագայում, ընդգծել էր. «Եթե երկրում զանգվածային անկարգություններ են, քաոս է, ու ազգային ուժերը չեն կարողանում վերահսկել դրանք, ապա Հավաքական անվտանգության խորհրդի որոշմամբ, որը կընդունվի կոնսենսուսով, կարելի է օգտագործել ՀԱՊԿ-ի պոտենցիալը: Ընդգծում եմ՝ ոչ թե զորամիավորումները կամ հատուկ ստորաբաժանումները, այլ պոտենցիալը, իսկ կազմակերպության պոտենցիալը միայն ուժային չէ»:
