Նոյեմբերի 10-ն ընդունված է համարել երիտասարդության միջազգային օր, թեև շատերը նշում են, որ դա այդպես չէ: Այդուամենայնիվ, հայ երիտասարդների համար միևնույն է, թե երբ է իրենց օրը, քանզի նախ որևէ կերպ այդ օրը չի հիշատակվում, և երկրորդ` հայ երիտասարդն այնքան խնդիրներ ունի, որ տոների ժամանակ չունի ու չափազանց քիչ ակտիվություն է դրսևորում երկրում կատարվող իրադարձությունների նկատմամբ:
«Ժառանգություն» կուսակցության վարչության անդամ, երիտասարդական հարցերով պատասխանատու Դավիթ Սանասարյանի կարծիքով, երիտասարդության մասնակցությունը մի շարք իրադարձությունների ակնառու է, սակայն այլ հարց է, թե որքանով է արդյունավետ այդ մասնակցությունը: Իսկ քաղաքականության մեջ, ըստ Դավիթի, երիտասարդները հիմնականում ստանձնում են իրենց ավագ գործընկերների փաստաբանի դերը. «Ես չեմ տեսնում երիտասարդների տարբերությունը իրենց ավագ գործընկերներից: Երիտասարդները պետք է ավելի ծայրահեղ, ակտիվ և հեղափոխական դիրքերից հանդես գան: Կուսակցություններն այսօր երիտասարդացվում են ոչ թե այն պատճառով, որ հասկացել են դրա կարևորությունը, այլ ուղղակի` դա իմիտացիոն բնույթ է կրում: Նրանք հասկանում են, որ եթե շեշտը դնեն երիտասարդների ներգրավման վրա, ապա որոշակի շահեկան դիրքեր կունենան»:
Դավիթի խոսքերով, այսօրվա երիտասարդները որոշակի ակտիվություն դրսևորում են. «Լեզվի մասին օրենքի հետ կապված բողոքի ակցիաներին շատ երիտասարդներ էին մասնակցում, նրանք նաև ակտիվություն են ցուցաբերում բնապահպանական խնդիրների հետ կապված: Որոշակի փոփոխություններ, այնուամենայնիվ, ես զգում եմ»:
Դավիթի կարծիքով, երիտասարդներն այսօր պետության ուշադրությունից դուրս են. «Այսօր ինչ-որ բնակարաններ են հատկացնում երիտասարդներին` իբրև թե մտածելով նրանց մասին, սակայն պարզ է, որ դրանք ավելի շատ իմիտացիոն գործընթացներ են, մենք կոնկրետ աջակցությունը չենք տեսնում, ուսանողական վարկավորումներ չկան»: