Արժույթի միջազգային հիմնադրամի գործադիր տնօրեն Քրիստին Լագարդը կոչ է արել ստեղծել միջազգային արժութային ավելի ամուր համակարգ, որի առկայությամբ իրենց ավելի ապահով կզգան ոչ միայն զարգացած, այլև զարգացող երկրները, որոնք այսօր ավելի քիչ են պաշտպանված՝ տեղեկացնում է ria.ru-ն:
«Ժամանակակից տնտեսությունը բազմաբևեռ է, բարդ և փոխկապակցված: Մենք համարում ենք, որ արժույթի միջազգային համակարգը պետք է ավելի ամուր լինի՝ այնպիսին, որ ոչ միայն զարգացած տնտեսություններն իրենց անվտանգ զգան, այլև որպեսզի Չինաստանը և այլ զարգացող տնտեսություններ կարողանան վերականգնել զարգացումը և անվտանգ շարունակեն խորացնել ֆինանսական և տնտեսական ինտեգրացիան: Չինաստանը՝ որպես աշխարհի առաջատար տնտեսություններից մեկը, պետք է որոշիչ դեր խաղա»,- հայտարարել է Լագարդը Պեկինի Զարգացման ֆորումում:
Լագարդը նաև նշել է, որ համակարգը փոփոխությունների կարիք ունի, այսպիսին այն ձևավորվել է 2008թ.՝ միջազգային ֆինանսական ճգնաժամի ֆոնին, իսկ դրանից հետո շատ բան է փոխվել: Նա ընդգծել է, որ պետք է ամրացնել միջազգային համագործակցությունը այն խնդիրների և հարցերի շուրջ, որոնք ազդում են համաշխարհային տնտեսության կայունության վրա: