ԱՄՆ նախագահի թեկնածուներ՝ միլիարդատեր Դոնալդ Թրամփը և Ֆլորիդայի նախկին նահանգապետ Ջեբ Բուշը հառուստաբանավեճերի ընթացքում բանավիճել են Իրաքի պատերազմի և սիրիական հակամարտությանը Ռուսաստանի միջամտության շուրջ, գրում է bbc.com-ը:
Թրամփի կարծիքով՝ ԱՄՆ-ն ընդհանրապես 2001թ. սեպտեմբերի 11-ի ահաբեկչությունից հետո չպետք է ներխուժեր Իրաք: «Նրանք խաբեցին, նրանք ասում էին, որ այնտեղ մասսայական ոչնչացման զենք կա, բայց այնտեղ ոչ մի զենք էլ չկար, և դա նրանք գիտեին»,- հայտարարել է նա:
Ջեբ Բուշն իր հերթին պաշտպանել է իր եղբոր՝ Ջորջ Բուշ կրտսերի վարած քաղաքականությունը: «Ես հոգնել եմ այն բանից, որ նախագահ Օբաման իր առջև ծագած բոլոր խնդիրների համար մեղադրում է իմ եղբորը, և ինձ չեն հուզում Թրամփի խոսքերը»,- ասել նա:
Թեկնածուները նաև տարակարծիք էին ԴԱԻՇ-ի դեմ պայքարում Ռուսաստանի դերի վերաբերյալ:
Թրամփի կարծիքով՝ Ռուսաստանը կարող է արդյունավետ դաշնակից լինել ԴԱԻՇ-ի դեմ պայքարում, և ԱՄՆ-ն պետք է հասկանա, թե ում դեմ է կռվում Սիրիայում»:
Սակայն Ջեբ Բուշը կարծում է, որ Մոսկվան Վաշինգտոնի դաշնակիցը չէ, քանի որ Ռուսաստանը Սիրիայում ռմբակոծում է այն ուժերին, որոնց աջակցում է ԱՄՆ-ն: