Ռուսաստանի նախագահ Վլադիմիր Պուտինի որոշ քաղաքական կանխատեսումներ՝ արված 2007-ի անվտանգության հարցերով Մյունխենի համաժողովի ժամանակ, իրականացել են: Այս մասին հաղորդում է Sputnik գործակալությունը՝ վկայակոչելով Եվրախորհրդարանի փոխնախագահ Ալեքսանդր Լամբսդորֆին:
2007-ի Մյունխենի համաժողովում իր ելույթի ժամանակ նախագահ Պուտինը քննադատել է ԱՄՆ-ի կողմից ստեղծված միջազգային քաղաքականության միաբևեռությունը: Նա նաև նշել է, որ ՆԱՏՕ-ի ուժերի օգտագործումը՝ ՄԱԿ-ի կանոնադրությունը շրջանցելով, և Մերձավոր Արևելքում իրադրության անկայունությունը միջուկային սպառազինության նոր մրցավազք են հրահրում, ինչը կարող է հանգեցնել ծայրահեղականության աճի:
«Դժբախտաբար, որոշ բաներ, որոնք 2007-ին նկարագրել է նախագահ Պուտինը, իրականում տեղի ունեցան, սակայն հետաքրքիր է՝ ինչու դա տեղի ունեցավ, ինչպես մենք խուսափենք բացասական միտումներից և դրանք փոխենք դրականի»,- հայտարարել է Լամբսդորֆը: