Զիկա վիրուսի դեմ պատվաստանյութի փորձարկումները կսկսվեն 18 ամսից ոչ շուտ: Այս մասին հայտնում է AP գործակալությունը՝ վկայակոչելով Առողջապահության համաշխարհային կազմակերպության գլխավոր տնօրենի՝ առողջապահության և ինովացիոն համակարգերի հարցերով օգնական Մարի Պոլ Քինիի հայտարարությունը:
Քինին նաև նշել է, որ ԱՀԿ-ն շատ արագորեն է արձագանքում վիրուսի բռնկմանը, և պատվաստանյութն ստեղծելու համար արդեն որոշված են 15 հնարավոր ընկերությունները։
Առաջին անգամ Զիկա տենդը հայտնաբերվել է 1947 թվականին, Ուգանդայում: Վիրուսն առաջացնում է բարձր ջերմություն, կոնյունկտիվիտ, գլխացավեր և հոդացավեր, բորբոքային պրոցեսներ, իսկ առանձին դեպքերում՝ սրտխառնոց ու փսխում, ստամոքսի խանգարումներ ու ցավեր:
Վիրուսի տարածողը Aedes aegypti մոծակն է: Հիվանդության բռնկումներ են գրանցվել Ասիայում, Աֆրիկայում, Հարավային և Հյուսիսային Ամերիկայում և Խաղաղօվկիանոսյան տարածաշրջանում։
