«Հանրապետություն» կուսակցությունը մերժել է մարտի 1-ին Ազատության հրապարակում հրավիրված հանրահավաքին մասնակցելու մասին «Նոր Հայաստանի» առաջարկը: Այդ մասին Armtimes.com–ի հետ զրույցում տեղեկացրել է շարժման անունից «Հանրապետություն» կուսակցության հետ բանակցություններ անցկացրած «Ժողովրդավարական Հայրենիք» կուսակցության նախագահ Պետրոս Մակեյանը:
Մակեյանի փոխանցմամբ՝ իր հետ զրույցում ահա թե ինչպես է այդ որոշումը պատճառաբանել «Հանրապետություն» կուսակցության առաջնորդ Արամ Սարգսյանը. «Արամ Սարգսյանի փաստարկը հետեւյալն էր, որ իրենք 2009 թվականից մարտի 1-ի որեւէ հանրահավաքի չեն մասնակցել, մասնակցել են միայն Մյասնիկյանի արձանի մոտ ծաղիկներ, պսակներ դնելու արարողությամբ, եւ բնականաբար այդ ավանդույթը չեն ցանկանում փոխել»:
Մակեյանն ասել է, թե Արամ Սարգսյանից փորձել է հարցը երկրորդ անգամ ճշտել. «Ճիշտն ասած ես 2010 եւ 2011 թվականների համար հարցրի Արամ Զավենի Սարգսյանին, որ էդ թվականներին չե՞ք մասնակցել, ասաց չէ: Ես էլ վստահ չէի, որ մասնակցել են…»,- ասաց Մակեյանը:
Արամ Սարգսյանը կայքի հետ զրույցում պնդել է իր դիրքորոշումը. «Ես երբեք ապրիլի 24-ը, հոկտեմբերի 27-ը, մարտի 1-ը չեմ համարել հանրահավաքի օր եւ չեմ նախաձեռնել: Ու մերժել եմ նման առաջարկները: Մշտապես մասնակցել եմ հիշատակի արարողություններին, որից հետո ընկերներիս հետ այցելել եկեղեցի ու մոմ վառել զոհերի հոգիների հանգստության համար: Նույնը կանեմ նաեւ այս տարի: Անգամ 2010-ին, երբ ՀԱԿ-ում առաջարկեցին հոկտեմբերի 27-ին հանրահավաք անել (եւ վստահաբար շատ մարդ կգար), ես դեմ եղա, որովհետեւ չեմ ընդունում նման որոշումը»:
Մանրամասները՝ սկզբնաղբյուր կայքում