Անճշտություններ ընտրացուցակներում, ճնշումներ դիտորդների նկատմամբ, լրագրողների աշխատանքի խոչընդոտում, իշխանությունների կողմից կենտրոնացված հսկայական հանրային միջոցներ սահմանադրական փոփոխությունների օգտին քարոզելու համար: Այս և մի շարք այլ դիտարկումներ տեղ են գտել ԵԱՀԿ-ի Ժողովրդավարական հաստատությունների և Մարդու իրավունքների գրասենյակի փորձագիտական խմբի հրապարակած դեկտեմբերի 6-ին Հայաստանում անցկացված սահմանադրական հանրաքվեի վերաբերյալ վերջնական զեկույցում:
«Ոչ»-ի կողմնակից քաղաքական ուժերը, հասարակական կազմակերպությունները սպասում էին այս զեկույցին: Սակայն, ծավալուն զեկույցի հանրաքվեի վերաբերյալ բացասական դիտարկումներին հետևում է ընդամենը մեկ նախադասություն, որը զրոյացնում է վարչական ռեսուրսների օգտագործման ու խախտումների մասին փաստարկները.
«Սույն զեկույցը սահմանափակված է շրջանակներով և չի ներկայացնում հանրաքվեի գործընթացի վերաբերյալ ընդհանուր գնահատական»:
Համապետական մի քանի ընտրություններում դիտորդական առաքելություն իրականացրած Զառա Հովհաննիսյանը նկատում է՝ ԵԱՀԿ-ի Ժողովրդավարական հաստատությունների և Մարդու իրավունքների գրասենյակի փորձագիտական խմբի նախկին զեկույցներում չնայած, որ կրկին խոսվում էր որոշ խախտումների վերաբերյալ, վերջնական արդյունքները, սակայն, կասկածի տակ չէին առնվում: Եվ այս զեկույցը նախորդների կրկնությունն է:
Միջազգային և անվտանգության հարցերի հայկական ինստիտուտի ղեկավար Ստյոպա Սաֆարյանի դիտարկմամբ՝ նախորդ զեկույցների համեմատ գնահատականների խստացում նկատվում է, սակայն եզրակացությունների առումով ոչ:
Սաֆարյանը հիշում է՝ 2013 թվականի նախագահական ընտրությունների խախտումներն անարձագանք մնացին ԵԱՀԿ/ԺՄԻԳ-ի կողից, պատճառը ասոցացման համաձայնագրի շուրջ Հայաստանի և Եվրամիության միջև ընթացող բանակցություններն էին:
Սակայն մյուս կողմից, Սաֆարյանը վստահ է, ասոցացման պայմանագրից հրաժարվելը դաս է եվրոպական կողմի համար, որ Հայաստանի իշխանությունների վերաբերյալ կոշտ գնահատականներ չհնչեցնելը համաձայնագրի ստորագրման երաշխիք է: Իսկ զեկույցում տեղ գտած զգուշացումները խորհրդարանական ընտրություններին ընդառաջ վկայում են այն մասին, որ եվրոպական կողմի ռեակցիան համաձայնագրից այս անգամ ևս ետ կանգնելու դեպքում կարող է էլ ավելի կոշտ լինել: