Թուրքական Dünya Bülteni լրատվական կենտրոնի փոխանցմամբ՝ Թուրքիայի ջրային պաշարների ու անտառտնտեսության նախարար Վեյսել Էրօղլուն հայտարարել է, որ Եփրատ ու Տիգրիս գետերի վրա ամբարտակներ ու հիդրոէլեկտրակայաններ կառուցելու վերաբերյալ Հարավ-արևելյան անատոլիական (GAP) նախագծի հետ կապված բոլոր աշխատանքներն ավարտվելու են 2019 թվականի վերջին։
Էրօղլուն ընդգծել է, որ GAP-ի էներգետիկ բաղադրիչի 73 տոկոսն ավարտված է, և խմելու ջրի խնդիրը մեծապես լուծվել է. «Ինչպես գիտենք, GAP-ը շատ մեծ նախագիծ է։ Անգամ աշխարհի մասշտաբով այն նմանատիպ ամենամեծ նախագծերից մեկն է։
2008 թվականին նախագահ Ռեջեփ Էրդողանը Դիարբեքիրում տվել է GAP-ի առաջին պլանի մեկնարկը, իսկ նախորդ տարի երկրորդ փուլի մեկնարկը տվեց մեր վարչապետ Ահմեթ Դավութօղլուն։ Եթե ամեն ինչ ստացվի, մենք GAP-ի հետ կապված բոլոր աշխատանքներն ավարտելու ենք 2019 թվականի վերջին։
GAP-ն այնպիսի մեծ նախագիծ է, որ երկրի տնտեսությունում ունի 6.6 միլիարդ դոլարի ներդրում, որից 4 միլիարդ դոլարը բաժին է ընկնելու էներգետիկ ոլորտին, իսկ մնացածը՝ ոռոգման ոլորտին։ GAP-ի նախագիծը մեր 9 նահանգում մասնավորապես դառնալու է սննդամթերքի արտադրման ու արտահանման բազա»։
Հիշեցնենք, որ GAP նախագծի շրջանակներում նախատեսված է Եփրատ և Տիգրիս գետերի վրա կառուցել 22 ջրամբար և 19 ՀԷԿ, ինչի շնորհիվ հնարավոր կլինի տարեկան ոռոգել 1.82 միլիոն հեկտար հողատարածք և արտադրել 27 միլիարդ կՎտ/ժամ էլեկտրաէներգիա (ՀԷԿ-երի հզորությունը կազմելու է 7485 մեգավատտ)։ GAP-ն առնչվում է Թուրքիայի տարածքի 9.7 տոկոսին՝ 75.358 քառակուսի կիլոմետր (9 նահանգ): GAP-ը նախատեսում է ոռոգել Թուրքիայի ոռոգելի ողջ հողերի (8.5 միլիոն հեկտար) 20 տոկոսը, իսկ ՀԷԿ-երի դեպքում՝ 21 տոկոսը: GAP-ի շնորհիվ վերահսկողության տակ կառնվի Թուրքիայի ջրային պոտենցիալի 28-29 տոկոսը: