«Նոր Հայաստան» հանրային փրկության ճակատի քաղաքական խորհուրդը երեկ հայտարարությամբ ոստիկանությանն առաջարկել էր մինչև դեկտեմբերի 1-ը հանդիպել՝ երկրի անվտանգության համակարգի նկատմամբ հանրության վստահությունը վերականգնելու և քննարկելու դեկտեմբերի 1-ից Հայաստանում մեկնարկող շուրջօրյա հրապարակային միջոցառումների անվտանգության ապահովման լրացուցիչ միջոցներ ձեռնարկելու գործնական հարցերը:
Հանդիպումը, սակայն այդպես էլ չի կայացել: Փոխոստիկանապետ Հունան Պողոսյանն այսօր մեր թղթակցի հետ զրույցում ասել է, որ «Նոր Հայաստանի» ներկայացուցիչները պետք է այսօր ժամը 17-ին այցելեին ոստիկանություն, սակայն երբ ոստիկանությունը զանգահարել է «Նոր Հայաստան»- ի ներկայացուցիչներին, նրանք չեն պատասխանել հեռախոսազանգերին, և չեն գնացել հանդիպման:
Քանի որ նամակը ոստիկանություն ուղարկվել է «Նոր Հայաստան»-ի ներկայացուցիչ Անդրեաս Ղուկասյանի անունից, վերջինից հետաքրքրվեցինք, թե ի՞նչն է պատճառը, որ ոստիկանության հետ հանդիպման նախաձեռնությամբ հանդես եկած «Նոր Հայաստան»-ը չի գնացել ոստիկանության հետ հանդիպման:
«Էդպես չի եղել: Ժամը 15-ին գնդապետ Օսիպյանը զանգահարել է ինձ և տեղեկացրել է, որ ժամը 17-ին ոստիկանությունը հրավիրում է մեզ հանդիպման իրենց վարչական շենքում»,- մեր հարցին ի պատասխան ասաց Անդրեաս Ղուկասյանը՝ հավելելով. «Սակայն, քանի որ հանդիպման ժամը մեզ հարմար չի եղել, մենք հանդիպակած առաջարկ արեցինք՝ ժամը 18-ին հանդիպել «Նոր Հայաստան» հանրային փրկության ճակատի շտաբում: Գնդապետ Օսիպյանն ասաց, որ առաջարկը կճշտի իր ղեկավարության հետ, սակայն առ հիմա սպասում ենք իրենց արձագանքին, որը որ չկա»:
Ըստ Անդրեաս Ղուկասյանի՝ փոխոստիկանապետ Հունան Պողոսյանը հիմք չի ունեցել նման հայտարարություն անելու: «Ըստ երևույթին, այդ հայտարարությունը պետք է դիտարկել որպես ոստիկանության կողմից հանդիպումից հրաժարվելու հայտարարություն: Մենք գտնում էինք, որ կարևոր է այս պահին հանդիպումը ոստիկանության ղեկավարների հետ, որովհետև տեսնում ենք, որ քաղաքացիների մոտ կա ապակողմնորոշում երկրում իրավիճակի վերաբերյալ և անհրաժեշտ են լրացուցիչ միջոցներ նաև խաղաղ հավաքների անվտանգությունն ապահովելու համար: Առաջարկ արեցինք ոստիկանությանը՝ հանդիպել մեզ հետ և քննարկել, որպեսզի բացառել որևէ սադրանք որևէ մեկի կողմից: Մենք գտնում ենք, որ հանդիպումը չկայացավ ոստիկանության պատճառով և դրանով ոստիկանությունն իր վրա է վերցնում պատասխանատվության ամբողջականությունը խաղաղ միջոցառումների անվտանգությունն ապահովելու առումով»,- ասաց «Նոր Հայաստան»-ի ներկայացուցիչը:
Նշենք, որ ըստ «Նոր Հայաստան» հանրային փրկության ճակատի՝ քաղաքացիական հանրության արձագանքը էական դեր կատարեց նոյեմբերի 25-ին զինված խումբ բացահայտելու վերաբերյալ տեղեկատվությունը ընդդիմության հետ կապելու սադրիչ փորձը ձախողելու գործում և դրանով իսկ հանրությունը հաստատեց իր համոզմունքը, որ ընդդիմությունը քրեական վարչախմբի դեմ պայքարում է բացառապես խաղաղ միջոցներով: