Ադրբեջանական APA լրատվական գործակալության փոխանցմամբ, Ղազախստանի մայրաքաղաք Աստանայի է Rixos President հյուրանոցում կայացել է Ադրբեջանի ու Թուրքիայի խորհրդարանների նախագահներ Օգտայ Ասադովի ու Մեհմեթ Ալի Շահինի հանդիպումը:
Կարճատև հանդիպման ընթացքում կողմերը քննարկել են Թյուրքալեզու երկրների խորհրդարանական վեհաժողովի (ԹԵԽՎ) գլխավոր քարտուղարության բյուջեի ավելացման խնդիրները:
Նշվում է, որ Աստանայում կայացող ԹԵԽՎ-ի երկրորդ նստաշրջանին մասնակցում են Թուրքիայի, Ադրբեջանի, Ղազախստանի ու Ղրղզստանի խորհրդարանների ղեկավարները:
Հիշեցնենք, որ ԹԵԽՎ-ի ստեղծման գաղափարը պատկանում է Ղազախստանի նախագահ Նուրսուլթան Նազարբաևին, որն այդ մասին առաջին անգամ բարձրաձայնել է 2006 թվականի նոյեմբերին` թյուրքալեզու երկրների ղեկավարների 8-րդ գագաթնաժողովի ժամանակ:
ԹԵԽՎ-ի ստեղծման մասին համաձայնագիրը ստորագրվեց 2008 թվականի նոյեմբերի 21-ին`Ստամբուլում կայացած թյուրքալեզու երկրների խորհրդարանների նախագահների համաժողովի ժամանակ: Որոշվեց ԹԵԽՎ-ի գլխավոր քարտուղարությունը տեղակայել Բաքվում:
ԹԵԽՎ-ի հիմնումը հետապնդում էր թյուրքալեզու 6 պետությունների միջև խորհրդարանական միավորման տեսքով միասնական մեխանիզմ ստեղծելու նպատակ, որը կնպաստեր նրանց միջև փորձի փոխանակմանը: