Թուրքիայի նախագահ Ռեջեփ Թայիփ Էրդողանը փորձել է Ռուսաստանի նախագահ Վլադիմիր Պուտինին զանգահարել «Սու-24»-ի վրա հարձակումից 7-8 ժամ անց: TASS-ի հաղորդմամբ՝ այս մասին լրագրողներին ասել է ՌԴ նախագահի մամլո քարտուղար Դմիտրի Պեսկովը:
«Այո, դա եղել է այդ դեպքից մոտավորապես 7-8 ժամ անց, ոչ շուտ»,- նշել է Պեսկովը:
Նրա խոսքով՝ «այդ հայտի մասին նաև տեղեկացվել է նախագահին»:
Պեսկովը նաև հայտնել է, որ ռուսական «Սու-24»-ի վրա թուրքական ռազմաօդային ուժերի հարձակումից հետո նախագահների միջև շփում դեռ չի եղել: «Կարող եմ միայն ասել, որ բարձրագույն մակարդակով շփում դեռ չի եղել»,- ասել է Կրեմլի ներկայացուցիչը:
Հարցին՝ ներկայումս ի՞նչ տեսք ունի Թուրքիայի հետ երկխոսությունը, Պեսկովը պատասխանել է՝ «այն ներկայումս ոչ մի տեսք չունի, այն հիմա չկա»:
