CNN հեռուստաալիքը The Silk Road հաղորդման շրջանակում թողարկում է պատրաստել Երևանի մասին՝ «Երևան. Պատմության և տեխնոլոգիայի միջև»։
Հաղորդման սկզբում փոքրիկ անդրադարձ կատարելով Հայաստանին՝ նշվում է, որ լեռնային տարածաշրջանը բաժանում է Եվրոպան Ասիայից՝ հանդիսանալով Մետաքսի ճանապարհի ամենակարևոր տարանցիկ կետերից մեկը։
Երևանն աշխարհի հնագույն քաղաքներից մեկն է։ Հարավային Կովկասում գտնվող հնագույն խաչմերուկը մոտ 3000 տարեկան է։ Այժմ այն ավելի քան 1 մլն մարդու տուն է՝ ասվում է ծանոթության մեջ։ Նկարահանող խումբն անդրադառնում է արևոտ Երևանի՝ նկարահանման օրը տեղացած հորդառատ անձրևին ու արտասովոր ցուրտ եղանակին։
Նշվում է, որ ճարտարապետության մեծ մասը դեռևս արտացոլում է քաղաքի խորհրդային անցյալը։ Նկարահանող խումբը եղել է Կասկադում, հեռուստադիտողին ցուցադրել Օպերայի շենքը, եղել մայրաքաղաքի սրտում՝ Հանրապետության հրապարակում։ «Այն կողմում Ազգային պատկերասրահն է, որը մեկն է երկրում մշակույթին ու արվեստներին նվիրված բազմաթիվ հուշարձաններից»,- նշում է թղթակիցը։
Դարեր առաջ Հայաստանը եղել է Մետաքսի ճանապարհի կարևոր կանգառներից։ Այն եղել է տարանցիկ հանգույց, որտեղ կանգ են առել Չինաստանից Հռոմ ուղևորվող առևտրականները։
Նկարահանումներ են կատարվել հայկական շուկայում, որտեղ վաճառվում են տեղական արտադրանքներ՝ գյուղմթերք, չրեր, հայկական կոնյակ։
Այսօր երկիրն անուն է ձեռք բերել մեկ այլ խոշոր արտահանման շնորհիվ։ Խոսքը նորագույն տեխնոլոգիաների մասին է։ Ներկայացվում է ArmTab պլանշետների ստեղծման գործընթացը։ Դրանք ստեղծում է Վահան Չաքարյանը՝ հայ, ով 2 տասնամյակ բնակվել է Կալիֆոռնիայում։ Նա փորձում է գտնել մատչելի լուծումներ տեղական շուկայի համար։ Երևանում IТ ոլորտը փթթում է՝ համակարգչային ոլորտից ռոբոտիկա։
«Հայաստանը եղել է ինովացիայի, հետազոտությունների ու զարգացման կենտրոնում նույնիսկ խորհրդային ժամանակաշրջանից։ Կարելի է ասել՝ այն Խորհրդային Միության շրջանի Սիլիկոնե հովիտն է»,- ասել է RAFA Solutions ընկերության գլխավոր մենեջեր Ռաֆայել Ղասաբյանը։
Այժմ նորագույն տեխնոլոգիաներն արտահանվում են նոր՝ վիրտուալ Մետաքսի ճանապարհով։ Այս տարի ավելի վաղ 4 երիտասարդներ մշակել են ստվերային պատկերների համադրության Shadowmatic խաղը Apple-ի բջջային օպերացիոն համակարգի համար։ Այն մինչ օրս ներբեռնվել է ավելի քան 4 մլն անգամ։
Ինչպես ամենուր՝ այստեղ ևս ստարթափները բախվում են մարտահրավերների՝ փոփոխվող տեխնոլոգիաներից մինչև արտահանման հարցեր։ Սակայն ինչպես Չաքարյանն է ասում՝ այս ոլորտում հանգիստ չկա։
«Որքան շատ ստարթափներ ունենանք, այնքան կշատանան ներդրումները Հայաստանում, այնքան կավելանա երջանկության մակարդակը, այնքան քիչ երիտասարդներ կմտածեն աշխատանք գտնելու համար արտերկիր ուղևորվելու մասին»,- ասել է Չաքարյանը։
Նա 3 մլն դոլար է ներդրել և լիահույս է, որ շուտով իր տեխնոլոգիան հասանելի կլինի ողջ աշխարհում։