Հայաստանի տեղեկատվական և հաղորդակցության տեխնոլոգիաների ոլորտի մի շարք ընկերությունների նախաձեռնությամբ ստեղծվել է տեղեկատվական և հաղորդակցության տեխնոլոգիաների գործատուների միություն, որի նպատակն է ներկայացնել ու պաշտպանել ոլորտի գործատուների իրավունքներն ու շահերը:
Հաշվի առնելով Հայաստանում ՏՏ ոլորտի զարգացվածության աստիճանն ու առկա խնդիրները՝ միության հիմնական նպատակներից է աջակցել ոլորտի փոփոխվող պահանջները օրենսդրությանը համապատասխանեցնելուն, նպաստել փոքր և միջին բիզնեսի զարգացմանը և խթանել տեղեկատվական ու հաղորդակցության տեխնոլոգիաների ոլորտում ձեռներեցությունն ու նոր կազմակերպությունների ստեղծումը:
ՎիվաՍել-ՄՏՍ-ի գլխավոր տնօրեն Ռալֆ Յիրիկյանի դիտարկմամբ՝ Տեղեկատվական տեխնոլոգիաների ոլորտում առկա խնդիրները հիմնականում պայմանավորված են Հայաստանի տնտեսության անկմամբ:
Հայաստանի արդյունաբերողների և գործարարների միության նախագահ Արսեն Ղազարյանի կարծիքով՝ Հայաստանի տնտեսության զարգացման տեմպերի դանդաղումը իր ազդեցությունն է թողնում ՏՏ ոլորտի վրա: Սակայն ՏՏ ոլորտի զարգացվածության ազդեցությունը ընդհանուր տնտեսության վրա ևս մեծ է:
ՏՀՏ գործատուների միությունը նպատակ ունի նաև հատուկ ուշադրություն դարձնել դպրոցական և բուհական կրթությանը: