Երևանում մեկնարկած Ֆրանկոֆոնիայի միջազգային կազմակերպության նախարարական համաժողովի ժամանակՖրանկոֆոնիայի միջազգային կազմակերպության գլխավոր քարտուղար Միկայել Ժանը շեշտել է, որ Հայաստանը հանդիսանում է խորհրդանիշ, որտեղ հիշողությունը պահպանվում է, կրած տառապանքի կնիքը չի վերանում:«Արմենպրես»-ի փոխանցմամբ, ըստ նրա, միաժամանակ Հայաստանը նաև հույսի խորհրդանիշ է, որ կարողացել է վերածնվել ինքն իր համար և աշխարհի առջև:«Հայաստանն ունի մշտապես առաջ գնալու հատկություն»,- ասաց Ժանը` շնորհակալություն հայտնելով համաժողովի կազմակերպիչներին ջերմ ընդունելության համար:
Խոսելով Ֆրանկոֆոնիայի ծրագրերի մասի, Միկայել Ժանը շեշտեց, որ կազմակերպությունը պետք է նպաստի նոր ճանապարհների բացմանը, նոր լուծումներ գտնելուն, ինչը դյուրին չէ, և դիմագրավում է բազմաթիվ մարտահրավերների: «Ֆրանկոֆոնիան իր տարածքի բազմազանությամբ և ընդլայնվածությամբ է յուրահատուկ և հրատապ հարցերի կենտրոնում է: Շատ բան ենք ակնկալում. Ֆրանկոֆոնիան ոչ միայն պետք է համախմբի և ամրապնդի համերաշխությունը, այլև ամրապնդի իր տեղը իբրև միջազգային կարևոր դերակատար և գործընկեր: Այս ակտիվ դիվանագիտությունը , որը երբեմն իմ գործընկերները անվանում են հիպերակտիվ դիվանագիտություն, պետք է շարունակի սերտ աշխատել բոլոր միջազգային կազմակերպությունների և ՄԱԿ-ի մասնագիտացված կառույցների հետ: Ֆրանկոֆոնիան պետք է խոսի մեկ միասնական ձայնով: Աշխարհի խնդիրները ֆրանկոֆոնիայինն են»,- ընդգծել է Ժանը` հավելելով, որ Ֆրանկոֆոնիան բոլոր ճակատներում է և անելու շատ բան ունի:
Լուսանկարը` PAN Photo-ի