Ինչպես արդեն հայտնի է, սահմանադրական փոփոխությունների դեմ պայքարող «Չեք անցկացնի» քաղաքացիական նախաձեռնությունը հոկտեմբերի 5-ին Ազատության հրապարակում բողոքի ակցիա էր կազմակերպել։ Հավաքի մասնակիցները այնուհետև երթով շարժվել էին դեպի Ազգային ժողով, որտեղ պետք է տեղի ունենար սահմանադրական փոփոխությունների փաթեթի քվեարկությունը։ ԱԺ-ի դիմաց խաղաղ բողոքի ակցիան վերածվել էր ոստիկանության հետ բախման։ Արդյունքում բերման էր ենթարկվել 21 ակտիվիստ, ովքեր ավելի ուշ ազատ արձակվեցին։ Նախաձեռնության անդամները իրենց նկատմամբ ոստիկանության գործողություններն ավելի ուշ համարեցին անօրինական։ «Մեզ մայթերից առևանգել են»,- պնդում էին նրանք։
Մարդու իրավունքների պաշտպանի գրասենյակի աշխատակիցներն էլ այդ օրը եղան ոստիկանության բաժնում։ Ակտիվիստները նրանց ներկայացրին իրենց բողոքները ոստիկանության գործողությունների վերաբերյալ։ Այդ ժամանակ օմբուդսմենի տեղակալ Արմեն Գրիգորյանը մեզ փոխանցեց, որ իրենք կսպասեն ոստիկանության կողմից համապատասխան գրավոր մեկնաբանության, այնուհետև օմբուդսմենն իր եզրակացությունը կներկայացնի։
Դեպքերից անցել է 5 օր, սակայն ոստիկանությունը դեռ պատասխան չի ուղարկել օմբուդսմենի գրասենյակին։ «Առաջին լրատվականի» հետ զրույցում օմբուդսմենի տեղակալ Արմեն Գրիգորյանն ասաց, որ օրենքով նախատեսված է 30-օրյա ժամկետ, սակայն իրենք, հաշվի առնելով հարցի հրատապությունը, պատասխանն ակնկալում են ստանալ ավելի շուտ։ «Ժամկետների խախտում տեղի չի ունեցել։ Երբ կստանանք ոստիկանության գրավոր պատասխանը, այդ ժամանակ էլ օմբուդսմենն իր վերջնական գնահատականը կտա դեպքերի վերաբերյալ»,- ասաց Գրիգորյանը։
Ոստիկանության հասարակայնության հետ կապի և լրատվության վարչության պետ Աշոտ Ահարոնյանն էլ նշեց, որ առաջիկա 2-3 օրերի ընթացքում իրենք ՄԻՊ-ի գրասենյակին կպատասխանեն։
Մինչ ոստիկանությունը կպատասխանի Կարեն Անդրեասյանի գրասենյակի գրավոր հարցմանը, փաստաբան Տիգրան Եգորյանը և մի քանի այլ փաստաբաններ պատրաստվում են վարչական հայց ներկայացնել ընդդեմ ոստիկանության։ Հիշեցնենք՝ այդ օրը բերման ենթարկվածների մեջ եղել են մի քանի փաստաբաններ, այդ թվում՝ Տիգրան Եգորյանը։ Եգորյանը մեզ հետ զրույցի ժամանակ վստահորեն ասաց, որ Ազգային ժողովի դիմաց ոստիկանության գործողությունները եղել են հատուկ հրահանգով, այն էլ՝ քաղաքական։ «Ոստիկանության գործողությունները եղել են ոչ իրավաչափ։ Նրանք, ինչպես միշտ, գործել են հատուկ հրահանգով, վրեժխնդիր լինելու տարբերակով»,- նշեց նա՝ հավելելով, որ ակցիայի ժամանակ ոստիկանությունը բերման է ենթարկում ԱԺ պատգամավորի, ում անձեռնամխելիության իրավունքը դրանով խախտվել է։ Հոկտեմբերի 5-ին Բաղրամյանում տեղի ունեցածը համեմատելով հունիսի 23-ի առավոտյան Բաղրամյան պողոտայում տեղի ունեցածի հետ, ստացվում է մոտավորապես նույն պատկերը։ Հունիսի 23-ին էլ ոստիկանությունը ջրցան մեքենայով ցրեց նստացույցը՝ ընթացքում բերման ենթարկելով և տարբերանշաններով լրագրողներին և նստացույցի մասնակիցներին։ Փաստաբան Եգորյանը վերջում հավելեց, որ ոստիկանությունը պետք է պաշտոնապես ներողություն խնդրի։