«Կլինի դա կուսակցություն, թե կշարունակի գործել որպես միավորում՝ այս պահին չեմ կարող ասել: Իհարկե, ապագա ռազմավարության վերաբերյալ կան մոտեցումներ ու քննարկումներ: Այսօր արդեն մշակված են հիմնարար փաստաթղթերը, հիմնական քաղաքական մոտեցումները, որոնք լինելու են այն փաստաթղթային բազան, որի հիման վրա հետագայում կապահովվի գործունեությունը և տեսլականը, ու համապատասխան որոշում կընդունվի»,- «Առաջին լրատվական»-ի հետ զրույցում ասաց «Օրինաց երկիր» խմբակցության քարտուղար Մհեր Շահգելդյանը՝ անդրադառնալով իրենց նախաձեռնած «Հայկական վերածնունդ» միավորման հիման վրա նոր կուսակցության ստեղծմանն առնչվող հարցին:
Հիշեցնենք, որ դեռևս գարնանը, երբ ՕԵԿ-ը նախաձեռնել էր այդ միավորումը, այդ կուսակցության ներկայացուցիչները չէին բացառում, որ աշնանը այն կվերաձևակերպվի որպես կուսակցություն: Կարծիք կա, որ ՕԵԿ նախագահ Արթուր Բաղդասարյանը դա անում է թե՛ իր կուսակցությունը համալրելու և թե՛ «Օրինաց երկիր» անունից ձերբազատվելու համար:
Մ. Շահգելդյանը մեզ հետ զրույցում հերքեց շրջանառվող այն տեղեկությունները, թե Ա. Բաղդասարյանը բանակցություններ է վարում Ռուսաստանի հայերի միության նախագահ Արա Աբրահամյանի հետ հետագա քաղաքական համագործակցության ու առաջիկա համապետական ընտրություններին մասնակցելու նպատակով: «Այդ տեղեկությունները չեն համապատասխանում իրականությանը, այսօր մեր օրակարգում չկան նման խնդիրներ: Ա. Աբրահամյանի կողմից նման հայտարարություններ չկան, քննարկումներ տեղի չեն ունեցել: Իսկ Ա. Աբրահամյանն ու Ա. Բաղդասարյանը հին ընկերներ են, և այդ առումով կան, եղել են և պետք է լինեն»,- եզրափակեց նա: