Տերյան 25, 23 և Լալայանց 37 շենքերի բնակիչները դիմել էին ոստիկանություն իրենց բնակարանները ցածր գնահատած «Անիկոմ» ՍՊԸ-ի դեմ քրեական գործ հարուցելու համար, արդյունքում ՍՊԸ-ի դեմ արդեն հարուցվել է քրեական գործ:
«Առաջին լրատվական»-ի հետ զրույցում Տերյան 25 շենքի բնակիչ, գեղանկարիչ Վարդան Գաբրիելյանը նշեց, որ դիմող 230 ընտանիքներից 13 բնակիչ գործով արդեն իսկ տուժող են ճանաչվել, բնակիչներն արդեն հարցաքննվել են, իսկ մեղադրանք դեռևս չի ներկայացվել, քանի որ ընկերության ներկայացուցիչները դեռևս չեն հարցաքննվել։ «Մենք հրավիրել ենք ուրիշ ընկերություն, մեր գույքը գնահատվել է, «Անիկոմ»-ի գնահատածի հետ 2-7.5 անգամ տարբերություն կա։ Հստակ է, որ սա հանցագործություն է, որը ընկերությունը կատարել է «Լոկալ Դիվելոփերս» ընկերության, Ս. Մայրապետյանի պատվերով»,- ընդգծեց նա:
Վարդան Գաբրիելյանը նշեց, որ գումարային տարբերությունը ընդհանուր առմամբ կազմում է 3 մլն դոլար։ «Խոշոր խարդախություն է. ամեն գույքի գնահատման մեջ ամենացածրը որ հաշվենք՝ մոտավորապես 70-80 հազար դոլարի տարբերություն կա։ Եթե դրամով հաշվենք՝ մոտ մի 40 մլն դրամի տարբերություն կա ամենաքիչը։ Գույք կա, որ 220 մլն դրամի տարբերություն կա, մենք ուզում ենք՝ խարդախությունը բացահայտվի»,- նկատեց նա:
Վարդան Գաբրիելյանը տեղեկացրեց, որ չնայած քրեական գործ կա հարուցված, դատարաններում շարունակում են արագացված կարգով քննել բնակիչներին տներից վտարելու՝ «Լոկալ Դիվելոփերս» ընկերության հայցը. «Այնպիսի տպավորություն է, որ դատավորները Մայրապետյանի փաստաբանների փաստաբաններն են. ծիծաղելի իրավիճակում են էդ մարդիկ»:
Վարդան Գաբրիելյանը շեշտեց, որ այս ամենը կատարվում է Քոչարյանի հովանավորությամբ, որն ուզում է իր սկսած գործն ավարտել։ «Քոչարյանական սիստեմը չի մաքրվել, բեսպրեդելը շարունակվում է, ամեն տեղ նրա մարդկանցից կան, ցանկացած օղակում, հանցավոր համաձայնություններն իրենցն ասում են»,- նկատեց նա:
Մանրամասները՝ տեսանյութում։
