Ռուսական Ria Novosti լրատվական գործակալության փոխանցմամբ՝ ԵՄ-ն պաշտոնապես հավանություն է տվել Իրանի դեմ մի շարք պատժամիջոցների թուլացմանը, որպեսզի իրագործվի նրա միջուկային ծրագրի կարգավորման վերաբերյալ որոշումը։ Դա մասնավորապես վերաբերում է Իրանից միջուկային գործունեության հետ կապված սարքավորման դուրսբերմանը, Ֆորդուի (ուրանի հարստացման կենտրոն) ու Արակի (ծանր ջրով գործող ռեակտոր) օբյեկտների վերափոխմանը։
Այդ մասին նշված է ԵՄ Խորհրդի կոմյունիկեում. «Խորհուրդն ընդունել է առաջին նորմատիվային ակտերը, որոնք անհրաժեշտ են իրանական միջուկային խնդրի վերաբերյալ Գործողությունների համատեղ համապարփակ պլանի գործարկման համար, որը ձեռք է բերվել 2015 թվականի հուլիսի 14-ին Վիեննայում»։
ԵՄ Խորհուրդն ընդգծում է, որ ՄԱԿ-ի ԱԽ-ն հուլիսի 20-ին բանաձև է ընդունել, որը հնարավորություն է տալիս մեղմացնել գործող սահմանափակումները։ Կոմյունիկեում նշված է, որ այդ նորմատիվային ակտերը ԵՄ պաշտոնական տեղեկագրում կհրապարակվեն օգոստոսի 1-ին։
