Տրիպոլիում Մուամար Քադաֆիի ռեժիմի ներկայացուցիչների դատական գործընթացն անցկացվել է առանց արդար դատի միջազգային չափանիշների պահպանման և մեծաթիվ խախտումներով: Այս մասին RIA Novosti-ին ասել է ՄԱԿ-ի գերագույն հանձնակատարի վարչության մարդու իրավունքների հարցերով մամլո քարտուղար Ռավինա Շամդասանին:
Երեքշաբթի ավելի վաղ Տրիպոլիի քրեական դատարանը վերջնականապես մահապատիժ է սահմանել Մուամար Քադաֆիի ռեժիմի 8 ներկայացուցչի, այդ թվում՝ նրա որդի Սեյֆ ալ-Իսլամին:
«Մենք ակնդետ հետևել ենք կալանքի տակ պահելուն և դատական գործընթացին ու պարզել ենք, որ արդար դատի միջազգային չափանիշները չեն պահպանվել: Հիմնական բացթողումների թվում է կոնկրետ հանցագործությունների վերաբերյալ անհատական պատասխանատվություն սահմանելու անընդունակությունը: Նաև լուրջ խնդիրներ են եղել փաստաբաններին հասանելիության, վատ վերաբերմունքի մասին դիմումների և դատական գործընթացների հետ կապված, որոնք հեռակա կարգով են անցկացվել»,- ասել է նա:
Շամդասանին հիշեցրել է, որ ՄԱԿ-ի Մարդու իրավունքների հարցերով գերագույն հանձնակատարի վարչությունը հետևողականորեն հանդես է գալիս ցանկացած հանգամանքներում մահապատժի կիրառման արգելքի դեմ: Նրա խոսքով՝ ՄԱԿ-ի վարչությունը Լիբիայի իշխանություններին կոչ է անում պահպանել մարդու իրավունքները արդարադատության ավարտին, նաև հույս է հայտնում, որ Տրիպոլիի դատարանի վճիռը կարող է բողոքարկվել:
Քադաֆիի ռեժիմի ներկայացուցիչները մեղավոր են ճանաչվել ռազմական հանցագործությունների և 2011-ին բողոքի ակցիաների ճնշման ժամանակ ցուցարարների մահվան համար։
Ավելի վաղ հաղորդվել էր, որ Հաագան փորձում է հասնել Քադաֆիի որդուն իր իրավասությանը հանձնելուն՝ պատճառաբանելով, որ Լիբիայում Սեյֆ Ալ-Իսլամի դեմ դատի վրա կարող է ազդել քաղաքականությունը։