Ekurd.net-ի փոխանցմամբ՝ Մարդու իրավունքների հարցերով քրդական կազմակերպությունը ներկայացնող դոկտոր Ամիր Շարիֆին բաց նամակ է հղել ԱՄՆ նախագահ Բարաք Օբամային: Նամակում նա Սիրիայի քրդերի անունից Օբամային կոչ է արել դատապարտել Թուրքիայի մասնակցությունը ոչ վաղ անցյալում Քոբանի քաղաքի վրա ԴԱԻՇ-ի գործած հարձակմանը:
Նամակում նշված է, որ ԴԱԻՇ-ի զինյալները ծանր հանցանքներ են գործում քուրդ խաղաղ բնակիչների դեմ. «Այն ժամանակ, երբ մենք գտնվում ենք շոկային վիճակում ու վշտի մեջ, մեզ խորապես մտահոգում է ԴԱԻՇ-ին ու ջիհադական մյուս ուժերին Թուրքիայի կառավարության օգնությունը:
Չնայած պարոն Էրդողանի համառ հերքմանը՝ կան փաստագրական ակնհայտ ապացույցներ, որոնք հակառակն են փաստում: Թուրք դատախազները, լրագրողները, իրավապաշտպան կազմակերպությունները ի հայտ են բերել մի շարք անհերքելի ու լավ փաստագրված տվյալներ, որոնք վկայում են ԴԱԻՇ-ին Թուրքիայի կառավարության աջակցության մասին:
Թուրքիայի քաղաքականությունը խաթարում է ԴԱԻՇ-ի ահաբեկչության դեմ միջազգային դաշինքի շահերը: Human Rights Watch-ի ներկայացուցիչները նույնպես հաստատում են այն տեղեկատվությունը, որ օտար զինյալները Սիրիա են ներթափանցում Թուրքիայից, այդպիսով բերվում է զենք, գումար և այլն: ԴԱԻՇ-ի շարքերը համալրողների առյուծի բաժինը Սիրիա և Իրաք է մուտք գործում Թուրքիայի սահմանից:
Եվ խնդիրը թուրքական անվտանգության մարմինների թուլությունը չէ. ԴԱԻՇ-ի կողմից քրդական Քոբանի քաղաքի պաշարման ժամանակ նրանք բավական արդյունավետորեն հակազդել են իրենց ցեղակիցներին օգնության հասնելու Թուրքիայի քրդերի փորձերին: Խոսքը զինյալների համար նպատակամղված միջանցք բացելու մասին է: Քրդերը մի քանի անգամ փորձել են գործը հասցնել Թուրքիայի խորհրդարանի լսումներին, սակայն՝ ապարդյուն»:
Նամակում շնորհակալություն է հայտնվում ԱՄՆ-ին՝ քրդական ուժերին աջակցելու համար, և ուշադրություն է հրավիրվում ՆԱՏՕ-ի անդամ Թուրքիայի կասկածելի պահվածքի վրա: Նամակում անդրադարձ է կատարված նաև Թուրքիայում մարդու իրավունքների ոլորտում առկա խնդիրների մասին: Նամակի վերջում նշված է, որ ԱՄՆ կառավարության ու ՄԱԿ-ի հայտարարությունը Թուրքիայի կառավարությանը կհարկադրի վերանայել իր քաղաքականությունը՝ կապված ջիհադական ու իսլամական խմբերին աջակցելու հետ: