ԱՄՆ-ի Բալթիմոր քաղաքում հազարավոր մարդիկ դուրս են եկել ցույցի` ի նշան բողոքի սևամորթ տղամարդու սպանության դեմ, ում ոստիկանությունը ձերբակալել էր մեկ շաբաթ առաջ, հաղորդում է korrespondent.net-ը:
Որոշ ժամանակ անց խաղաղ ցույցերը վերածվել են ոստիկանության հետ բախումների. ցուցարարները կոտրել են ոստիկանական տեղամասերի ապակիներ, խանութների ցուցափեղկեր: Ձերբակալվել է առնվազն 12 մարդ:
Ոստիկանության տվյալներով` ապրիլի 12-ին 25-ամյա Ֆրեդի Գրեյը, փողոցում հանդիպելով ոստիկանության պարեկի, փախուստի է դիմել: Նրան ձերբակալել են, նստեցրել ոստիկանական մեքենա և ոտքերին, ձեռքերին ձեռնաշղթա են հագցրել ագրեսիվ պահվածքի համար:
Դեռևս հայտնի չէ՝ ինչպես է Գրեյը պարանոցի և ողնաշարի լուրջ վնասվածք ստացել, որի հետևանքով կոմայի մեջ է հայտնվել և մեկ շաբաթ անց մահացել:
Գրեյի երկվորյակ քույրը մարդկանց հանգստության կոչ է արել` հայտարարելով, որ իր ընտանիքը ցանկանում է կանգնեցնել բռնությունը: