«Նախագահը ետ է կանչել արձանագրությունները, բայց չեղյալ չի համարել գործընթացը: Մեր դիրքորոշումն ինչպես եղել է, այդպես էլ մնում է՝ առանց նախապայմանների գնալ հարաբերությունների կարգավորմանը: Լավրովի հայտարարությունը տեղավորվում է մեր այդ դիրքորոշման մեջ»,- «Առաջին լրատվական»-ի հետ զրույցում ասաց փոխարտգործնախարար Շավարշ Քոչարյանը՝ անդրադառնալով Ռուսաստանի արտգործնախարար Սերգեյ Լավրովի հայտարարությանը:
Հիշեցնենք, որ Ս.Լավրովը հայտարարել էր, թե «Մոսկվան կարող է նպաստել, որպեսզի Թուրքիայի և Հայաստանի միջև համագործակցության զարգացման մասին փաստաթղթերն ուժի մեջ մտնեն»:
Վերջին շրջանում Մոսկվան իր հայտարարություններով կամ գործողություններով կարծես թե փորձում է ավելի ակտիվություն դրսևորել հայ-թուրքական հարաբերություններում: Ավելին, փորձում է հայ-թուրքական հարաբերությունների կարգավորումը կապել Լեռնային ղարաբաղի հակամարտության կարգավորման հետ «Այդպիսի որևէ միտում առայսօր չի եղել, և դա ընդամենը ձեր ենթադրությունն է»,- հակադարձեց Շ.Քոչարյանը:
Հիշեցնենք, որ Լավրովը Sputnik, Эхо Москвы և Говорит Москва ռադիոկայաններին տված հարցազրույցում ասել էր, թե «մենք կողմ ենք, որպեսզի կարգավորվեն հայ-թուրքական հարաբերությունները, որպեսզի լուծվի Լեռնային Ղարաբաղի հակամարտությունը և դրանով կարգավորվեն հայ-ադրբեջանական հարաբերությունները»: