Օրերս Արգենտինայի նախագահ Քրիստինա Քիրշները հանդիպել է Արգենտինայի արդարադատության նախարար Խուլիո Ալակի, Արգենտինայի և Չիլիի Հայոց թեմի առաջնորդ Գիսակ արքեպիսկոպոս Մուրադյանի, գործարար Էդուարդո Էռնեկյանի, արդարադատության նախկին նախարար Լևոն Արսլանյանի հետ:
Գիսակ արքեպիսկոպոս Մուրադյանն «Առաջին լրատվական»-ի հետ զրույցում նշեց, որ նախագահն իր զորակցությունն է հայտնել Հայոց ցեղասպանության 100-րդ տարելիցի նախաշեմին: «Գնացել էինք հրավիրելու նրանց մեր ձեռնարկներին, դրանից հետո հրավիրելու նրան, որ միջոց գտնի Հայաստան այցելելու, նա թեև ոչ վերջնական պատասխան տվեց, բայց խոստացավ քննարկել»,-ասաց Գիսակ սրբազանը:
Գիսակ սրբազանը տեղեկացրեց, որ Արգենտինայի նախագահն ապրիլյան այս օրերին Մոսկվա պետք է ժամանի, և, հավանաբար, Մոսկվայից հետո էլ ժամանակ կգտնի Հայաստան այցելելու համար:
«Գլխավորաբար ինքը ուզեց Հայաստանում հուշատախտակ զետեղվի իր ամուսնու՝ Նեստոր Քիրշների հիշատակին, որ այստեղ ցեղասպանության օրենքի հաստատման գլխավոր նախաձեռնող գործիչն է»,-հավելեց սրբազանը:
Սրբազանը նշեց, որ ինքը դժբախտաբար Հայաստանում չի կարող լինել ապրիլի 24-ին, քանի որ Արգենտինայում մի շարք միջոցառումներ ունեն իրականացնելու, մասնավորապես` մեծ դահլիճներից մեկում 100-րդ տարելիցին նվիրված միջոցառում է լինելու, որտեղ ներկա են լինելու քաղաքական դեմքեր, գեղարվեստական ղեկավարներ:
Գիսակ սրբազանը բարձր գնահատեց ապրիլի 12-ին Վատիկանում Հռոմի պապի կողմից մատուցած պատարագը՝ նշելով, որ թուրքերի՝ այս օրերի կեցվածքն արդեն իսկ ցույց է տալիս, թե դա ինչ արդյունք է գրանցել, ամբողջ կաթոլիկ աշխարհի պետը պաշտոնապես ցեղասպանություն որակեց, և սա շատ կարևոր էր և մեծ ազդեցություն ունեցավ վստահաբար ամբողջ աշխարհի մեջ:
Ի դեպ, թե Արգենտինայի նախկին և թե ներկայիս դեսպան Ալեքսան Հարությունյանի օրոք աշխատանքներ, ըստ սրբազանի, կատարվում են:
«Այս մեկը տակավին նոր է, մենք միշտ օգտակար ենք լինում, համայնքը միշտ խորհրդակցություն է ունենում հետը, այնպես որ նախկինն իր անելիքն արել է, սա դեռ նոր է, և կամաց- կամաց կվարժվի նախորդների նման»,-հավելեց Գիսակ սրբազանը:
