Այսօր կառավարության դիմաց պիկետ էին կազմակերպել «Հայաստանի սոցիալիստական շարժում», «Ազգային արժեքների պահպանման ճակատ» ՀԿ-ները՝ «Պոռնոաստղին պետական մակարդակով ընդունելու դեմ»: Նրանք վարչապետ Հովիկ Աբրահամյանին ուղղված նամակը հանձնեցին կառավարության ընդունարան: Նամակում Հովիկ Աբրահամյանին կոչ են անում կանգ առնել և հիմա էլ պետական պարգևներ չշնորհել Քիմ Քարդաշյանին: ՀԿ-ների ներկայացուցիչները ևս մեկ անգամ շեշտեցին՝ իրենք ոչ թե Քիմին են դեմ, այլ նրան պետական մակարդակով, աղ ու հացով, հայկական տարազով դիմավորելուն:
«Իհարկե, բոլոր առիթները պետք է օգտագործենք Հայաստան բրենդը աշխարհով մեկ տարածելու համար, բայց ամեն ինչ ունի իր սահմանը: Եկեք չմոռանանք մեր արժեհամակարգի մասին ու չվտանգենք այն՝ պոռնոաստղին Հայաստանում գովազդելով»,- նշված էր նամակում:
«Հայաստանի սոցիալիստական շարժում» ՀԿ նախագահ Ռոբերտ Ահարոնյանն ընդգծեց, որ Քիմ Քարդաշյանին լավագույն դեպքում պիտի ընդուներ մշակույթի նախարարը կամ շոու-բիզնեսի ներկայացուցիչները. «Հայոց ցեղասպանությունը և Հայաստանը պետք չէ գովազդել Քիմի տուտուզով»,- ասաց նա և հավելեց, որ եթե այսպիսի պահվածքը շարունակվի և Քիմին հիմա էլ մեդալներ շնորհեն, արդեն այլ քայլերի կդիմեն. «Եթե Սուրբ Մեսրոպ Մաշտոցի շքանշան տան Քիմին, ես և շատերը նստացույց կանենք»,- ասաց նա:
Մանրամասները ՝ տեսանյութում: