Մի շարք ԶԼՄ-ներ հրապարակել են The Beatles խմբի նախկին մասնակից Ռինգո Սթարի հարցազրույցը, որում երաժիշտը հայտարարել է, թե Փոլ Մաքքարթնին զոհվել է դեռևս 1966-ին: Իսկ այս տարիների ընթացքում Մաքքարթնիի անվամբ հանդես է եկել նրա նմանակը: Այս մասին գրում է Inquistir-ը:
Նշվում է, որ լուրը հրապարակող պարբերականներից մեծ մասը հղում է անում Hollywood Inquirer պարբերականին, որի հետ հարցազրույցի ժամանակ The Beatles-ի նախկին դմբկահարն իբր թե խոստովանել է, որ Փոլ Մաքարթնիի անվան ներքո թաքնվում է ոմն Բիլի Շիրսը:
«Երբ Փոլը մահացավ, մենք խուճապի մատնվեցինք: Մենք չգիտեինք` ինչ անել, և մեր մենեջեր Բրայան Էփսթայն առաջարկեց Փոլին ժամանակավորապես փոխարինել Բիլի Շիրսով: Նա պետք է խմբում ընդամենը մի քանի շաբաթ մնար, սակայն երկրպագուներից կամ լրագրողներից ոչ ոք չնկատեց փոփոխությունը: Այդ ժամանակ մենք որոշեցինք Շիրսին խմբի մշտական անդամ դարձնել, քանի որ նա Փոլից առավել լավ պրոֆեսիոնալ երաժիշտ էր»,- ասել է Ռինգո Սթարը:
Նշվում է, սակայն, որ երբևէ Hollywood Inquirer անունով ո́չ կայք է գոյություն ունեցել, ո́չ պարբերական:
Նշենք նաև, որ մամուլում առաջին անգամ չէ, որ շրջանառվում են Փոլ Մաքարթնիի` մահացած լինելու մասին լուրեր:
