ԲՀԿ խմբակցության անդամ, նախկին արտգործնախարար Վարդան Օսկանյանը հայտարարել է, որ ինքը մարտի 5-ին նշանակված համագումարի ժամանակ շնորհակալություն է հայտնելու Գագիկ Ծառուկյանին անցած ճանապարհի համար, և հայտարարելու է կուսակցությունից դուրս գալու մասին: Պատճառն այն է, որ Օսկանյանը ցանկացել է ինքը դառնալ կուսակցության նախագահ, սակայն կուսակցական ընկերները դեմ են եղել Օսկանյանի թեկնածությանը՝ համարելով, որ նա հանրության կողմից չընկալվող գործիչ է: Ըստ ԲՀԿ-ականների՝ Օսկանյանը կուսակցական քննարկումների ժամանակ հայտարարել է. «Ես պատրաստ եմ վերցնել կուսակցության դրոշը և այն առաջ տանել», նկատի ունենալով, որ պատրաստ է ստանձնել ԲՀԿ նախագահի պաշտոնը: Իսկ երբ կուսակիցները հասկացրել են, որ իրենք համաձայն չեն, որ նա վերցնի կուսակցության դրոշը, Օսկանյանն ասել է, որ այդ դեպքում ինքը իմաստ չի տեսնում մնալ ԲՀԿ-ում և վայր է դնելու պատգամավորական մանդատը:
Օսկանյանի նախագահությանը դեմ է եղել նաև ԲՀԿ կոորդինատորի և ֆինանսավորողի դեր ստանձնած Աբրահամ Մանուկյանը: Ըստ ԲՀԿ մեր աղբյուրների՝ հենց նա է վերցրել կամ նրա վրա է դրվել կուսակցության տարածքային կառույցների աշխատանքի կազմակերպման, դրանց ֆինանսավորման, ինչպես նաև կուսակցության խորհրդարանական խմբակցության անդամների հավելավճարների վճարման ֆինանսական բեռը: Մանուկյանը համաձայնել է մտնել նման ծանր բեռի տակ՝ այն հույսով, որ 2017թ. խորհրդարանական ընտրություններից հետո ԲՀԿ-ն կարող է զգալի ներկայացվածություն ունենալ խորհրդարանում, և ՀՀԿ-ն թույլ կտա, որ ԲՀԿ-ն ինչ-որ մաս ունենա կառավարող կոալիցիայում: Այդ դեպքում առողջապահության նախկին փոխնախարար Աբրահամ Մանուկյանը ոչ միայն կիրականացնի իր վաղեմի երազանքը՝ կդառնա նախարար, այլ նաև հնարավորություն կստանա նախարարներ նշանակելու և կոմպենսացնելու իր կատարած ֆինանսական ներդրումները:
Եթե ԲՀԿ-ն ուզում է ապագա կառավարությունում տեղ ունենալ, ապա պետք է պաշտպանի սահմանադրական փոփոխությունների գաղափարը և դառնա այս հարցում ՀՀԿ դաշնակիցը: Առաջիկա երկու տարիների ընթացքում իշխանության համար չկա ավելի կարևոր քաղաքական միջոցառում, քան սահմանադրական փոփոխությունների հանրաքվեի անցկացումը, և եթե ԲՀԿ-ականները միանան այդ փոփոխությանը կողմնակից ուժերի դաշինքին, ապա հնարավոր է՝ ԲՀԿ-ն ավելի շուտ հնարավորություն ստանա մոտ գնալ իշխանական կերակրատաշտին:
Մինչ ԲՀԿ-ականները մտածում են ապագա կառավարությունում ինչ-որ «փայ մտնելու» մասին, նախկին ԲՀԿ-ականներն ու իշխանությունները փորձում են բաժանել ԲՀԿ-ի չնչին ունեցվածքը: Խոսքը, մասնավորապես, ԱԺ գյուղատնտեսության և բնապահպանության հանձնաժողովի նախագահի պաշտոնի մասին է: Երբ այդ հանձնաժողովի նախագահ Մարտուն Գրիգորյանը կուսակիցներին հայտնել է կուսակցությունից դուրս գալու իր որոշման մասին, ԲՀԿ-ականները նրան զգուշացրել են, որ այդ դեպքում նա պետք է հրաժարվի Դոնթի բանաձևով ԲՀԿ-ին բաժին հասած հիշյալ հանձնաժողովի նախագահի պաշտոնից: Գրիգորյանը պատասխանել է, որ ինքը խնդիր չունի, և կուսակցությունից դուրս գալու հետ կներկայացնի հանձնաժողովի նախագահի պաշտոնից հրաժարականի դիմում: Սակայն Գրիգորյանը ԱԺ ՀՀԿ-ական ղեկավարությանը հայտնել է, որ հնարավորության սահմաններում ինքը կցանկանար մնալ հանձնաժողովի նախագահ:
Որպեսզի հնարավոր լինի ԲՀԿ ձեռքից վերցնել նրան բաժին հասած 4 հանձնաժողովներից մեկը, ապա ԲՀԿ խմբակցության թիվը առնվազն մեկ քառորդով պետք է պակասի՝ նախկին 36-ի փոխարեն դառնալով 27-28 հոգի: Սակայն ԲՀԿ խմբակցությունը առայժմ լքել են միայն երկու պատգամավոր՝ Մուշեղ Պետոյանը և Գրիգորի Մարգարյանը: Եթե նրանց միանա նաև Մարտուն Գրիգորյանը, ապա խմբակցության անդամների թիվը կդառնա 33: Խմբակցությունից կարող է դուրս գալ նաև պատգամավորական մանդատը վայր դնելու մասին հայտարարած Մելիք Մանուկյանը, սակայն, ըստ ԲՀԿ-ականների, նա իրենց խոստացել է, որ ոչ միայն հետ է վերցնելու պատգամավորական մանդատը վայր դնելու մասին իր հայտարարությունը, այլ նաև շարունակելու է մնալ ԲՀԿ խմբակցությունում:
Մեծամասնական ընտրակարգով պատգամավոր ընտրված մյուս ԲՀԿ-ական պատգամավորը՝ Լյովա Խաչատրյանը ևս, ԲՀԿ-ականներին հայտնել է, որ մտադիր չէ լքել կուսակցությունը և խմբակցությունը: Ինչ վերաբերում է կուսակցությունը լքած Արագած Ախոյանին, Կարո Կարապետյանին, Հարություն Ղարագյոզյանին, ապա նրանք, չլինելով ԲՀԿ անդամ, շարունակում են մնալ ԲՀԿ խմբակցությունում, և ԲՀԿ-ականները համարում են, որ ներկա իրողության պայմաններում ԱԺ ղեկավարությունը, անգամ մեծ ցանկության դեպքում, չի կարող իրենցից վերցնել խորհրդարանական հանձնաժողովի նախագահի պաշտոնը: Չնայած՝ հնարավոր է նաև մեկ այլ տարբերակ, երբ Մարտուն Գրիգորյանն ինքը «չորով» հրաժարական չտա հանձնաժողովի նախագահի պաշտոնից, իսկ հանձնաժողովում մեծամասնություն կազմող ՀՀԿ-ականները նրան պաշտոնանկ չանեն: Այդպիսի դեպք խորհրդարանում կա: Ուղղակի այս դեպքում ԲՀԿ-ականները նրան կմեղադրեն իր խոսքը դրժելու և «տղայականով» իրեն սխալ պահելու համար:
