Հայաստանում, ավանդաբար, սերնդեսերունդ փոխանցվող մեղադրանքների փաթեթ կա, որոնցից մեկն էլ այն է, որ Հանրային հեռուստաընկերությունը չի սպասարկում հանրային շահը։ Այս մասին մեզ հետ զրույցում ասաց ԱԺ ՀՀԿ խմբակցության պատգամավոր, Սամվել Ֆարմանյանը։
Նրա խոսքով՝ դա այնքան տարածված մեղադրանք է, որ նույնիսկ հակառակը պնդելն իմաստ չունի, որովհետև ինչ էլ ասես՝ ինքն այնքան դաջված ու խորն է, որ մարդը կլսի քո կարծիքը, բայց չի համաձայնի քեզ հետ։ «Իսկ ես եմ կարծում, որ Հ1-ի հեռուստաեթերը սպասարկում է հանրային շահը։ Այստեղ խնդիրն այն է, որ ՀՀ-ում կան քաղաքական կուսակցություններ ու գործիչներ, որոնցից յուրաքանչյուրի սպասելիքը հակառակ համեմատական է իր գործընկերոջ սպասելիքների հետ։ Ավելի պարզ ասած՝ ես Հ1-ի հեռուստաեթերը կհամարեմ լավը՝ եթե ես ինչ խոսեմ կամ դուրս տամ ԱԺ ամբիոնից, ամբողջությամբ հեռարձակվի։ Այ դեպքում ես կասեմ, որ եթերը շատ լավն է և օբյեկտիվ։ Բայց եկեք հասկանանք, որ հեռուստաեթերը չի կարող ամբողջությամբ բավարարել բոլոր քաղաքական ուժերի սպասելիքները, որոնք սուբյեկտիվ են»,- ընդգծեց Ֆարմանյանը։
Նա նշեց, որ, օրինակ, «Կենտրոն» հեռուստաալիքի լրատվական թողարկումները լավագույն օրինակը կարող են լինել միակողմանի լրատվության ապահովման և բազմակարծության բացառման։ «Մարդ կա մեր գործընկերներից, որ մի խոսք չի կարող ասել դրա մասին, որովհետև դա իրեն ձեռնտու չէ։ Դրա համար ես խորհուրդ եմ տալիս և́ ՀՌԱՀ-ի, և́ Հ1-ի ղեկավարություններին առավելագույնս լսել քաղաքական ուժերի, գործիչների կարծիքները հեռուստաեթերի վերաբերյալ, փորձել վերցնել օգտակարը, եթե այդպիսիք կան, իսկ մնացածը Delete անել և գցել Recycle Bin-ը»,- ասաց Ս. Ֆարմանյանը։
Դիտարկմանը, որ «Կենտրոն»-ը և մյուս հեռուստաընկերությունները մասնավոր են, մինչդեռ Հ1-ը հանրային է, որն այդպես էլ չի սպասարկում հանրային շահը, և անգամ կատակ կա, երբ ասում են՝ կցանկանայի քնել ու արթնանալ Հ1-ի նկարագրած Հայաստանում, Ֆարմանյանը պատասխանեց. «Դա այնքան դաջված կարծիք է, որ դեռ երկար ժամանակ կպահանջվի, մինչև փոփոխությունները, որ տեղի են ունենում, հանրային գիտակցության մեջ ընկալվեն։ Այսօր Հ1-ը բալանսավորված լուսաբանում է երկրում տեղի ունեցող քաղաքական իրադարձությունները»։
Ավելին՝ տեսանյութում:
