Թուրքիայի ընդդիմադիր Ժողովրդահանրապետական կուսակցության ներկայացուցիչները միանգամից մի քանի նահանգներում մամուլի ասուլիս են հրավիրել և մեկնաբանել Թուրքիայի ԱԳՆ-ում տեղի ունեցած վերջին սկանդալային միջադեպը, երբ Դարդանելի գործողությունների 100-րդ տարելիցի շրջանակներում իրականացվելիք միջոցառումների ժամանակացույցում Ծիծեռնակաբերդի` Հայոց ցեղասպանության զոհերի հիշատակին նվիրված հուշարձանի մի լուսանկար է ընդգրկվել։ Այս մասին հաղորդում է թուրքական «Դողան» լրատվական գործակալությունը։
«Այն, ինչ կատարվել է Թուրքիայի արտաքին գործերի նախարարությունում, ամոթալի է մեզ համար։ Այս հարցը խորհրդարանի օրակարգ ենք մտցնելու։ Կատարվածի համար միայն իշխող «Արդարություն և զարգացում» կուսակցությունն է մեղավոր՝ նախագահ Ռեջեփ Թայիփ Էրդողանի գլխավորությամբ։ Հայերի անհիմն պնդումների դեմ պայքարելիս պետք է զգոնություն ցուցաբերենք, բայց փոխարենը նման սխալներ ենք թույլ տալիս», – հայտարարել են քեմալական կուսակցության ներկայացուցիչները։
Քեմալական կուսակցությունն իր պատմության ողջ ընթացքում հանդես է եկել հայերի դեմ ուղղված քաղաքականությամբ, Հայոց ցեղասպանության հարցում մշտապես ժխտողական դիրքորոշում է ունեցել։ Ընդամենը մի քանի օր առաջ ԺՀԿ-ի երեք պատգամավորներ, որոնք Հրանտ Դինքի հիշատակին նվիրված երթի ժամանակ կանգնել էին Հայոց ցեղասպանության մասին պաստառի հետևում, կոշտ քննադատության արժանացան կուսակցության կողմից։ Անգամ բարձրացվեց նրանց կարգապահական տույժի ենթարկելու հարցը։
Հիշեցնենք, որ օրերս թուրքական մամուլում հրապարակվել է Ծիծեռնակաբերդի մի լուսանկար, որն ընդգրկվել է Թուրքիայի ԱԳՆ-ի պատրաստած Դարդանելի ճակատամարտի (հայտնի է նաև Չանաքքալեի, Գալիպոլիի պատերազմ) 100-րդ տարելիցի միջոցառումների ժամանակացույցում։ Սույն միջադեպը լուրջ իրարանցում է առաջացրել Թուրքիայի արտաքին քաղաքական գերատեսչության ներսում։ Հետաքննություն է կատարվում՝ պարզելու համար, թե ով է կանգնած կատարվածի հետևում։
