«Քննարկվել են ամենատարբեր քաղաքական, սոցիալական հարցեր, Հայաստան-Եվրամիություն հարաբերությունների հետագա զարգացման հնարավորությունները: Քննարկվեց նաև այսօրվա իրավիճակը: Ներկայիս իրավիճակի հետ կապված կա լիարժեք ընկալում: Խոսվում է այն մասին, որ Արևելյան գործընկերությունը պետք է թարմացնի իր մոտեցումները և յուրաքանչյուր պետության համար ունենա առանձին մոդել»,- Առաջին լրատվական»-ի հետ զրույցում ասաց Ազգային ժողովի արտաքին հարցերի մշտական հանձնաժողովի նախագահ Արտակ Զաքարյանը՝ անդրադառնալով Եվրոպական խորհրդի փոխնախագահ Ռիչարդ Չառնեցկու հետ հանդիպմանը:
Ա. Զաքարյանի խոսքերով՝ Ռ. Չառնեցկին ասել է, թե չկա այնպիսի եվրոպական երկիր, որը չհայտարարի, որ հարգում և ընկալում է Հայաստանի մոտեցումն ու ու Հայաստանի նոր ինտեգրացիոն պայմանավորվածությունները: Տվյալ դեպքում խոսքը վերաբերում է Եվրասիական տնտեսական միությանը մեր երկրի անդամակցելուն: «Առաջին արձագանքն, ըստ էության, ավելի շատ էմոցիոնալ էր, քան թե պաշտոնական: Պաշտոնական շրջանակները և տեղեկացված են, և շատ լավ գնահատում են Հայաստանի քաղաքականությունն ի սկզբանե»,- ասաց Ա. Զաքարյանը:
Ա. Զաքարյանի ասելով՝ Արևմուտքում կա հարգանք Հայաստանի սուվերեն որոշման նկատմամբ: Եվ դա խոսում է այն մասին, որ տարածաշրջանային զարգացումներն ապացուցեցին՝ Հայաստանի պարագայում բազմավեկտոր քաղաքականությունն արդարացված է: «Հայաստանն իրավունք չունի բաժանարար գծերի քաղաքականություն վարելու: Հայաստանի և հայ ժողովրդի շահերից չի բխում, ունենալով նուրբ և փխրուն խնդիրներ, անվտանգ միջավայրի ապահովման համար կատարել կոշտ անցումներ կամ չհիմնավորված գործողություններ, որոնք որ կարող են վտանգի տակ դնել մի շարք երևույթներ»,- հավելեց նա:
Պատգամավորի կարծիքով՝ նման պարագայում Հայաստանը կարող է ԵՄ-ի և Արևելյան գործընկերության համագործակցությունն ավելի արդյունավետ շարունակելու համար լինել օրինակելի մոդել:
