ՄՄ անդամակցությունն ինքնիշխանության որոշակի զիջում է ենթադրում: Այս մասին այսօր լրագրողների հետ հանդիպման ժամանակ ասաց ՀՀ-ում իր դիվանագիտական առաքելությունն ավարտող ԱՄՆ դեսպան Ջոն Հեֆերնը՝ անդրադառնալով Հայաստանի ԵՏՄ անդամակցությանը և խոսակցություններին, թե ՀՀ-ն ԵՏՄ-ում կորցնելու է իր ինքնիշխանությունը:
Դեսպանն ասաց, որ հավատացած են ու կարծում են, որ ցանկացած երկիր, ցանկացած անկախ, ինքնիշխան երկիր իրավասու է անդամակցել իր ընտրությամբ ցանկացած միության: Ըստ նրա՝ սա հիմնարար սկզբունք է անկախ, ինքնիշխան պետությունների համար, և բոլոր երկրներն ունեն դրա իրավունքը:
«Երբ երկիրը միանում է Մաքսային միությանը, ես այստեղ իրավական հարցերի մասին չեմ խոսում, նշանակում է, որ որոշակի ոլորտներում առևտրային հարցերի շուրջ ինքնիշխանության զիջում է տեղի ունենում, բայց դա երկրի ընտրությամբ է, քանի որ երկիրն անդամակցում է վերազգային կառույցի: Այստեղ «այո» կամ «ոչ» պատասխան չեմ կարող տալ, կարող եմ ասել, որ մաքսային միությունները որոշումներ են կայացնում անդամների համար նրանց իսկ համաձայնությամբ:
ՀՀ-ի ԵՏՄ անդամակցության որոշումն ինքնիշխան որոշում էր, և թե ինչպիսին կլինի այդ միության դերակատարումը՝ կախված կլինի նրանից, թե ինչ որոշումներ կկայացվեն այնտեղ: ՀՀ կառավարությունից մեզ ասում են, որ ՀՀ-ն շարունակում է հետաքրքրված լինել ԵՄ-ի, ԱՄՆ-ի հետ գործակցությամբ: Ցանկացած ոլորտում, որն անհամադրելի չէ ԵՏՄ-ի շրջանակում ՀՀ ստանձնած հանձնառություններին, մենք ևս պատրաստ ենք խոր համագործակցության»,- ասաց դեսպանը:
Անդրադառնալով ԱՄՆ մուտքի արտոնագրի դյուրացման շուրջ Երևանի և Վաշինգտոնի համաձայնությանը՝ Հեֆերնն ասաց, որ Հայաստանին և ՀՀ քաղաքացիներին առաջարկվել է հնարավոր ամենաերկար վավերականության ժամկետը վիզաների համար, և դրա նպատալը հստակ է՝ ժողովուրդների միջև կապերն առավելագույնի հասցնել. գործարարներ, գիտաշխատողներ և այլն:
«Այս համաձայնությամբ ապահովում ենք ՀՀ քաղաքացիների համար առավելագույն վավերականության ժամկետ, և դա երկկողմ հարաբերություններին օգտակար է: Տասը տարվա վիզան տրվում է մեկ վիզայի գնով, և ամեն տարի անհրաժեշտություն չի առաջանա կրկին դիմել: Կարծում ենք, որ սա կարևոր ձեռքբերում է երկու ժողովուրդների համար, և մենք ուրախ ենք, որ ՀՀ կառավարության հետ կարողացել ենք իրականացնել այս ծրագիրը»,- ասաց դեսպանը: