Արշակունյաց 49 հասցեում այսօր բացվեց Հանրային իրավունքի եվրոպական կազմակերպության երևանյան մասնաճյուղը:
ՀԻԵԿ-ն ամբողջ աշխարհում իրավաբանների ավելի լավ սերնդի և ժողովրդավարական ինստիտուտների ստեղծման նպատակով հանրային իրավունքի lato sensu ոլորտում՝ ներառյալ, բայց առանց սահմանափակման համապետական և եվրոպական հանրային իրավունքի, մարդու իրավունքների և բնապահպանական ոլորտում գիտելիքների ստեղծմանն ու տարածմանը նվիրված միջազգային կազմակերպություն է: Այն հիմնադրվել է 2007 թվականին Հունաստանում՝ Աթենքում, և արագորեն ընդլայնվում է: Այսօր 6 միջազգային կազմակերպություններ և հանրային մարմիններ, 64 համալսարաններ և ինստիտուտներ կազմակերպության անդամ են: Աթենքում է գտնվում կազմակերպության գլխամասային գրասենյակը, իսկ 14 գրասենյակ կա ամբողջ աշխարհում:
ՀԻԵԿ-ի տնօրենների խորհրդի նախագահ Սպիրիդոն Ֆլոգայդիսն այսօր ներկա էր մասնաճյուղի բացման հանդիսավոր արարողությանը: Նա նախ ընդգծեց, որ ուրախ է լինել Հայասատնում և շատ է ափսոսում, որ հայերն ու հույները տարիներ շարունակ կողք կողքի ապրելով՝ այդպես էլ միմյանց լեզուները չեն սովորել և ստիպված են հաղորդակցվել երրորդ լեզվով՝ անգլերենով:
«Մասնաճյուղը մեծ ազդեցություն կունենա ամբողջ տարածաշրջանի վրա. այս երկրում արդեն շատ մեծ աշխատանք է կատարվել: Մենք պատրաստակամ ենք ընդլայնելու մեր ներկայությունն ու ավելի խոր համագործակցելու»,- ասաց նա:
ՀԻԵԿ-ի երևանյան մասնաճյուղի տնօրեն Գրիգոր Մինասյանն էլ ընդգծեց, որ Հայաստանն իր անկախության առաջին տարիներից մեծ ջանքեր է ներդրել եվրոպական իրավահամակարգին ինտեգրվելու համար. «ՀԻԵԿ-ը միջազգային մասնագիտացված լրջագույն կազմակերպություն է, որի անդամներն են մի շարք պետություններ՝ եվրոպական, և ոչ միայն եվրոպական համալսարաններ: Երկարատև աշխատանքի շնորհիվ Հայաստանում բացվում է տարածաշրջանի առաջին և միակ մասնաճյուղը. այն հնարավորություն կտա հայ իրավագետներին սկսել և շարունակել համագործակցությունը մեր եվրոպական գործընկերների հետ»:
Նրա խոսքով՝ հայաստանյան մասնաճյուղի բացումը հնարավորություն կտա մեր երիտասարդ իրավաբաններին, հայաստանյան իրավաբանական ֆակուլտետների ուսանողներին, ասպիրատներին՝ մասնակցել առաջատար համալսարաններում վերապատրաստման, մեր երիտասարդ գիտնականներին հնարավորություն կընձեռի իրենց գիտական հոդվածները տպագրել բարձրագույն որակավորում ուենցող միջազգային հանդեսներում:
Առավել մանրամասն՝ տեսանյութում:
Լուսանկարը` PAN Photo-ի
