Այս պահին Մալաթիա-Սեբաստիա վարչական շրջանում շարունակվում է երթուղային տաքսիների վարորդների բողոքի ակցիան՝ ընդդեմ գազի գնի թանկացման: Տարբեր երթուղիներ սպասարկող երթուղային տաքսիներ դադարեցրել են ուղևորափոխադրումը: Վարորդները պնդում են, որ կշարունակեն գործադուլն այնքան ժամանակ, քանի դեռ հարցին լուծում չի տրվել: Նրանց խոսքով՝ հարցի լուծման երկու տարբերակ կա՝ կա՛մ պետք է գազի սակագինը նվազեցվի, կա՛մ բարձրացվի ուղևորափոխադրման վարձը մինչև 200 դրամ:
Քիչ առաջ բողոքի ակցիա անցկացնող վարորդներին մոտեցավ քաղաքապետարանի տրանսպորտի վարչության պետ Հենրիկ Նավասարդյանը, ով փորձեց հանդարտեցնել վարորդներին՝ համոզելով շարունակել ուղևորափոխադրումը և միևնույն ժամանակ հայտարարելով, որ քաղաքապետարանն իրավասու չէ գազի սակագնի հետ կապված հարցին լուծում տալ և ազդել սակագնի նվազման վրա:
«Մենք գազի թանկացման հետ կապ չունենք, բայց կփորձենք հարցը բարձրացնել վերևների մոտ, որոնք կփորձեն լուծում տալ հարցին: Այս պահի դրությամբ գազի գինը ստաբիլ չէ, պարբերաբար փոփոխվում է, և մենք, այնուամենայնիվ, պետք է սպասարկենք մեր բնակչությանը՝ անկախ խնդրից, իսկ ես գազի գնի հարց լուծողը չեմ»,- ասաց Նավասարդյանը:
Չնայած Նավասարդյանի կոչերին՝ վարորդները հայտարարեցին, որ չեն դադարեցնելու գործադուլը և չեն վարելու երթուղային տաքսիներն այնքան ժամանակ, քանի դեռ խնդրին լուծում չի տրվել և գազի սակագինը չի նվազել: