Դրամի կտրուկ արժեզրկումը բավական մեծ կորուստների առաջ է կանգնեցնում ոչ միայն մեր քաղաքացիներին, այլ նաև պետությանը: Հայտնի է, որ վերջին մի քանի օրերին դրամի արժեզրկման հետևանքով 1 դոլարը 416 դրամից դարձել է 436 դրամ: Դա լուրջ խնդիրներ է առաջ բերում թե բյուջետային, թե պետական այլ ծախսերի դեպքում: 2015 թ. բյուջեի նախագծում դոլարը հաշվարկվել է նոյեմբերի 1-ի կուրսով՝ 411 դրամով: Այսօր արդեն այդ արժեքը 25 դրամով բարձրացել է, և որոշ կարծիքների համաձայն՝ մինչև տարեվերջ 1 դոլարը կհասնի 450 դրամի, ինչն ավելի կբարդացնի իրավիճակը:
Դրամի արժեզրկման կորուստները կամ բացասական հետևանքները ցույց տալու համար կարելի է հիշել պետական մի ծախս, օրինակ՝ պետական պարտքի մարումը: Հայտնի է, որ մեր երկիրն ունի բավական մեծ արտաքին պարտք, որի սպասարկման համար յուրաքանչյուր տարվա բյուջեում որոշակի գումար է հատկացվում: 2015 թ. բյուջեի նախագծով պետական պարտքի սպասարկման համար նախատեսված է 192 միլիոն դոլար, որից 95 միլիոն դոլարը բաժին է ընկնում պարտքի մարմանը, 97 միլիոն դոլարն էլ՝ ընդհանուր պարտքի տոկոսավճարի համար: Այս գումարը, սակայն, ինչպես նշեցինք, հաշվարկված էր այն ժամանակ, երբ 1 դոլարն արժեր 411 դրամ: Մինչդեռ այն պետք է վճարվի 2015 թ., երբ դոլարը գուցե շատ ավելի բարձ գին կունենա, քան ունի այսօր: Բայց այսօրվա կուրսով՝ 436 դրամով արդեն այդ գումարի դրամական արժեքը մեծանում է:
Ընդհանուր պարտքի մարման դեպքում լրացուցիչ պետք է 1 միլիարդ 480 միլիոն դրամ հատկացվի, որ հնարավոր լինի գնել այդ 95 մլն դոլարն ու վճարել, իսկ տոկոսի դեպքում՝ արդեն 2 միլիարդ, 425 միլոն դրամ լրացուցիչ գումար: Այսինքն՝ ընդհանուր առմամբ, 2015 թ. պարտքի սպասարկման համար անհրաժեշտ կլինի լրացուցիչ մոտ 3 միլիարդ 860 միլոն դրամ կամ այսօրվա կուրսով՝ մոտ 8 մլն 853 հազար դոլար: Սակայն, ինչպես նշեցինք, չի բացառվում, որ հաջորդ տարի դրամը նորից արժեզրկվի, և 8.8 մլն դոլարը կրկնապատկվի:
Ֆինանսների փոխնախարար Պավել Սաֆարյանն այսօր «Առաջին լրատվական»-ի հետ զրույցում ասաց, որ 2015 թ. պետական պարտքի սպասարկման համար անհրաժեշտ այդ լրացուցիչ գումարը պետբյուջեից չի վճարվելու: Բյուջեից վճարելիք գումարը հաշվարկվելու է 411 դրամով: Իսկ դրամի արժեզրկման հետևանքով առաջացած կորուստը, փոխնախարարի խոսքով՝ ռիսկն իր վրա է վերցնելու Կենտրոնական բանկը: Այսինքն՝ վերը նշված 8.8 մլն դոլարը վճարվելու է ոչ թե պետբյուջեից, այլ ԿԲ-ից: Պետական պաշտոնյաններն այս մասին խոսում են մեծ մխիթարանքով, կարծես թե ԿԲ-ի գումարները մեր երկրի փողերը չեն: Պարզապես այս դեպքում մխիթարականն այն է, որ գոնե պետական պարտքի սպասարկման առումով բյուջեն լրացուցիչ խնդիրների առջև չի կանգնի: