Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ ավարտվեց Արթուր Մկրտչյանի գործի դատական քննությունը:
Այս գործով նույն դատարանում անցած տարվա հոկտեմբերին արդեն երեք հոգի դատվել են: Նրանց նկատմամբ համաներում է կիրառվել, ու երեքն էլ ազատվել են սահմանված պատիժների կրումից, երեքն էլ ազատ են արձակվել դատարանի դահլիճում:
Նրանցից մեկը՝ Գևորգը, վկայի կարգավիճակ ուներ ներկա գործով, իսկ մյուս երկուսը՝ Արթուր Ազիզյանն ու Կարեն Սուրբնշանյանը, գործով տուժողներն էին:
Արթուր Մկրտչյանը մեղադրվում էր այդ երկու տուժողներին դանակահարելու և կյանքին վտանգ սպառնացող ծանր վնասվածքներ պատճառելու համար:
Արթուր Մկրտչյանն ավելի ուշ է հայտնաբերվել, այդ պատճառով էլ նրա մասով գործի քննությունն ընդհանուր իրավասության դատարանում առանձին ընթացավ ու հիմա նոր ավարտվեց:
Դեպքի պահին 17-ամյա Արթուր Մկրտչյանը և Գևորգ Սերոբյանը՝ դպրոցականներ, իսկ տուժողներ Ազիզյանն ու Սուրբնշանյանը 21 տարեկան են եղել:
Ըստ մեղադրանքի՝ 2013 թվականի փետրվարի 28-ին դպրոցականներ Գևորգ Սերոբյանի, Արթուր Մկրտչյանի վեճը իրենցից մեծ երիտասարդների՝ Ազիզյանի և Սուրբնշանյանի հետ ծագել է «բարևելու» հետ կապված հարցերով:
Վիճաբանությանն այնպիսի նշանակություն են տվել, որ շարունակել են նաև հաջորդ օրը՝ մարտի 1-ին: Ժամը 15-ի սահմաններում կողմերը հանդիպել են Ս. Տարոնցու փողոցում գտնվող «Մաղիս» խանութի մոտ:
Օրը ցերեկով փողոցի մարդաշատ մասում աղմկոտ վիճաբանություն է եղել, երկկողմանի հայհոյանքներ են հնչել, Գևորգը մետաղե խողովակով հարվածներ է հասցրել հակառակորդներին:
Վերջիններս, որ մոտ ութ րոպե նույնպես ակտիվ խուլիգանական գործողություններ են կատարել, ի վերջո տուժել են դանակի հարվածներից, որոնք, ըստ մեղադրանքի՝ նրանց հասցրել է անչափահաս Արթուր Մկրտչյանը:
Տուժողների առողջությանը պատճառվել է ծանր վնաս՝ Ազիզյանի որովայնի առաջնային պատի ծակած-կտրած վերք, Սուրբնշանյանի կրծքավանդակի ծակած-կտրած, պնևմաթորաքս առաջացրած վերք:
Արթուր Մկրտչյանին մեղադրանք է առաջադրված երկու հոգու առողջությանը դիտավորությամբ ծանր վնաս հասցնելու և զենքի գործադրմամբ կատարած խուլիգանության համար՝ ՀՀ քրեական օրենսգրքի 112 հոդվածի 2-րդ մասի 1-ին կետով և 258 հոդվածի 4-րդ մասով:
Արթուր Մկրտչյանը դատարանում իրեն մեղավոր չի ճանաչել: Իսկ տուժողները նրա նկատմամբ բողոք կամ պահանջ չեն ներկայացրել:
Մեղադրանքը պաշտպանող դատախազն իր մեղադրական ճառում հաստատված է գնահատել Արթուր Մկրտչյանի մեղքը և միջնորդել է նրան դատապարտել 7 տարի ազատազրկման:
Ամբաստանյալի շահերի պաշտպանը պաշտպանական ճառում, ընդհակառակը, ապացուցված չի գնահատել իր պաշտպանյալին մեղսագրված արարքները և միջնորդել է արդարացնել նրան ու ճանաչել անպարտ:
Ամբաստանյալ Արթուր Մկրտչյանը միացավ իր պաշտպանին, ինքը պաշտպանական ճառով հանդես չեկավ, հետո ասաց, թե վերջին խոսք էլ չունի ասելու:
Ընդհանուր իրավասության դատարանը Արթուր Մկրտչյանին մեղավոր ճանաչեց և դատապարտեց 6 տարի ազատազրկման:
