«Մենք չենք կարող համարել, որ Հոկտեմբերի 27-ի գործը բացահայտված է: Նախաքննությունը պետք է պարզեր, իմանար՝ ովքեր էին գլխավորները, ովքեր պատրաստեցին այդ ոճիրը: Թեկուզ դրսի ուժերն արեցին, բայց նաև ներսի ուժերն էլ կողմնակից եղան: Ժողովուրդն ասում է՝ եթե գողը տնից չլինի, եզը երդիկից կհանեն»,- այսօր Եռաբլուրում լրագրողների հետ զրույցի ժամանակ անդրադառնալով Հոկտեմբերի 27-ի ոճրագործությանը՝ ասաց Վազգեն Սարգսյանի մայրը՝ տիկին Գրետան:
«Իրենք պետք է մտածեին, որ էս երկրի գլուխը կտրում են, էս երկրի տերերին սպանեցին, երկիրը կապրեր խաղաղ, հանգիստ, բարգավաճ, բայց այսպես եղավ, և հիմա ոչ մեկին էլ պետք չենք»,- հավելեց սպարապետի մայրը:
Նրա խոսքով՝ առ այսօր քաղաքական կամք չկա՝ բացահայտելու 27-ի ոճրագործությունը: «Քաղաքական կամք չկա, դատաքաննություն չեղավ նորմալ: Նույնիսկ պատգամավորները, որ այդքան շատ էին եղել այդ օրը ԱԺ-ում, մի քանի հոգին ցուցմունք տվեցին, բոլորը չեկան, ասեցին՝ 2 տարի է անցել, բան չենք հիշում»,- նկատեց տիկին Գրետան:
Վերջինիս խոսքով՝ եթե Վազգենը կենդանի լիներ, մենք հզոր երկիր կունենայինք, ոչ թե այնպիսին, ինչպիսին ունենք հիմա: «Նրանք այդ ժամանակ տեսնում էին, զգում էին, որ մենք ազգ ենք դառնում, որ կարող ենք իրենց հետ ոտք մեկնել, բայց մեզ թողեցինք այսպես՝ դեմքից զրկված ազգ»:
